वाराणसीमे रैली करबा पर नितिश कुमारकेँ गिरिराज सिंहक चुनौती

हिम्मत अछि तऽ प्रधानमंत्री मोदीक विरुद्ध चुनाव लड़ि देखाबैथ – गिरिराज

*

पटना

*

लोकसभा चुनाव २०२४क लेल विपक्षी एकताक तैयारी तेज भऽ गेल अछि। संगहि ई अनुमान लगाओल जा रहल अछि जे बिहारक मुख्यमंत्री नीतीश कुमार २४ दिसम्बरकेँ उत्तर प्रदेशक वाराणसीमे एकटा रैलीसँ अपन चुनाव अभियानक शुरुआत कऽ सकैत छथि।

एक दिस बिहारक राजनीति दिन-प्रतिदिन गर्म होइत देखल जा रहल अछि, तऽ दोसर दिस लोकसभा चुनाव २०२४ लेल विपक्षी एकताक तैयारी तेज भऽ गेल अछि। संगहि ई अनुमान लगाओल जा रहल अछि जे बिहारक मुख्यमंत्री नीतीश कुमार २४ दिसम्बरकेँ उत्तर प्रदेशक वाराणसीमे एकटा रैलीसँ अपन चुनाव अभियानक शुरुआत कऽ सकैत छथि। संगहि राजनीतिक गलियारामे राजनीति आ बयानबाजी तेज भऽ गेल अछि। केंद्रीय मंत्री गिरिराज सिंह वाराणसी जयबासँ पहिने नीतीश कुमार पर हमला कयलनि अछि। बुध कऽ सिंह कहला “हुनक (बिहारक मुख्यमंत्री नीतीश कुमार) अंत ओहि दिन भऽ गेल, जाहि दिन ओ विधानसभा आ परिषदमे व्याख्यान देलनि, महिलाक अपमान कयलनि आ ‘कामसूत्र’क नव लेखक बनि गेलाह। नीतीश कुमारक अर्जित प्रतिष्ठा ओही दिन खतम भऽ गेल छल।”

गिरिराज सिंह नीतीश कुमारक वाराणसी यात्राक विषयमे आगू कहलनि, “रैली निकालबासँ केकरो नहिं रोकल जाइत अछि, ओ एना कऽ सकैत छथि, मुदा हम नीतीश कुमारसँ आग्रह करैत छी जे जँ हुनकामे साहस अछि तखन हुनका वाराणसीमे नरेन्द्र मोदीक विरुद्ध चुनाव लड़बाक घोषणा करबाक चाही।”

फिलहाल नीतीश कुमार २०२४ सँ पहिने देशक आन्य राज्यमे जदयूक विस्तार पर काज कय रहल छथि। एही क्रममे वाराणसीमे ओ एकटा जनसभा करताह, फलतः भाजपा हमलावर अछि आ गिरिराज सिंह बिहार विधानसभामे सुरक्षित यौन सम्बन्धकेँ लऽ कऽ नीतीश कुमारक टिप्पणी पर भेल विवादकेँ याद दियाबैत कहलनि “नीतीश कुमार महिला आ दलितक बारेमे जाहि तरहक बात कयलाह, ओही दिन समाप्त भऽ गेलाह। आब अगिला लोकसभा चुनावमे नीतीश कुमारक लेल किछु नहि बाँचल अछि”, संगहि गिरिराज सिंह नीतीश कुमारकेँ चुनौती दैत कहलनि, “जँ हुनकामे हिम्मत अछि तँ ओ प्रधानमंत्री मोदीक विरुद्ध चुनाव लड़ि कय देखाबैथ।”

संगहि ओ आगू कहलनि, “पूरा देश जनैत अछि जे जेडीयू डूबैत नाव अछि। पैघ-पैघ नेता एक-एक कए जेडीयूसँ भागि रहल छथि। आब जखन डूबैत नावक संग ई स्थिति भऽ रहल अछि तखन हुनका लगैत अछि जे आब किछु नव करबाक चाही, जाहिसँ ओ मीडिया पर वापस आबि जाय।”

ओना, आब सबहक नजरि बिहारक मुख्यमंत्री नीतीश कुमार पर अछि जे ओ वाराणसीमे रैलीमे की करैत छथि आ कोना अपन पूरा गठबंधनकेँ आगू बढ़बैत छथि।