बीजेपी सरकारमे बिहारी होयब सबसँ पैघ अपराध आ देशद्रोह : तेजस्वी यादव
पटना। समदिया
दिल्लीमे एकटा बिहारी युवकक हत्याक बाद राजनीति गरमा गेल अछि। तेजस्वी यादव भाजपा पर कड़ा हमला केलथि, जाहिमे दोषीक खिलाफ निष्पक्ष जांच आ कार्यवाहीक मांग कयल गेल। दिल्लीमे खगड़िया निवासी 23 वर्षीय पांडव कुमार केर गोली मारल गेल, जखन कि हुनकर मित्र कृष्णाक हालत गंभीर अछि। एहि घटनाकेँ ल कय विपक्षक नेता तेजस्वी यादव भाजपा पर हमला कयलनि।
तेजस्वी यादव एक्स पर लिखलनि जे, “भाजपा सरकारम “बिहारी बनब” सबसँ पैघ अपराध आ देशद्रोह बनि गेल अछि। खगड़िया निवासी 23 वर्षीय पांडव कुमारकेँ नई दिल्लीमे सिर्फ एहि लेल गोली मारल गेल जे ओ “बिहारी” छलाह। हुनक मित्र कृष्णा बिहारी हेबाक अपराध लेल जीवन मृत्युक लड़ाई लड़ि रहल छथि।
देशक राजधानी दिल्लीमे जाहि जगह “बिहारी” जानि गोली मारल गेल ओतय निगम पार्षद बीजेपीक, विधायक बीजेपीक, सांसद बीजेपीक, सीएम बीजेपीक, बिहारक सीएम बीजेपीक, आधा दर्जन निष्क्रिय बड़बोले केंद्रीय मंत्री बिहारक, उपराज्यपाल बीजेपीक, गृहमंत्री बीजेपीक, प्रधानमंत्री बीजेपीक अछि। बीजेपी बिहारी लेल काल बनि चुकल अछि।
की एहि भाजपामे सँ किनकोमे हिम्मत अछि जे ओहि हत्यारा पुलिसकर्मीकेँ सजा देत जे एकटा गरीब, मेहनती बिहारीक हत्या कएलक? दरअसल, नीतीश कुमार-भाजपा केर तहत 21 सालक खराब नीतिक कारण बिहारी दोसर राज्यमे पलायन करय लेल मजबूर भ गेल छथि आओर दोसर राज्यक भाजपा सरकार आओर प्रशासन कर्मठ बिहारीक प्रति कोनो सम्मान नहि देखाबैत अछि। बल्कि ओकरा सभकेँ शंका, घृणा आ हीनतासँ देखैत अछि। जखन-जखन कोनो बिहारी पर अत्याचार होइत अछि तँ प्रवासी बिहारी उत्पीड़नक शिकार भ जाइत छथि।
केंद्रीय गृह मंत्रालयके अंतर्गत आबय वला आ जन सुरक्षाक जिम्मेदारी लेबय वला दिल्ली पुलिस खाली बिहारी होय केर कारणसँ कोनो व्यक्तिकेँ अपराधी मानलक आ ओकरा गोली मारलक। एहिसँ बेसी निन्दनीय की भ सकैत अछि? बड़बोले एनडीए नेता एही घटना पर बिलमे नुकायल अछि।
हम मांग करैत छी जे बिहारीकेँ परेशान करय वला तथाकथित डबल इंजन सरकार एहि मामिलाक गहन जांच कय तुरंत अपराधीकेँ कानूनक सोझा आनए। पीड़ित परिवारकें उचित मुआवजा प्रदान करय आ हत्याराकें सजा दय। ई घटना बिहार आ ओकर जनताक इज्जतक अपमान अछि। तेँ न्याय चाहि आ अखनि अविलंब चाहि।
