भूमिजा मैथिली मंचक बैसार गुरुग्रामक ‘मारुति कुंज’मे संपन्न

बैसारमे भूमिजा मैथिली मंचक स्थायी सदस्यताक शुभारंभ ऑनलाइन माध्यमसँ कयल गेल
*
गुरुग्राम
*

भूमिजा मैथिली मंचक बैसार १० मार्चकेँ गुरुग्रामक मारुति कुंजमे भेल। एहि बैसारमे गुरुग्रामक विभिन्न उपनिवेशक मैथिल समुदायक लोक उत्साहपूर्वक भाग लेलनि। बैसारक अध्यक्षता भूमिजा मैथिली मंचक अध्यक्ष महावीर मिश्र कयलनि, जतय सबसँ पहिने स्थायी सदस्यता पर गहन चर्चा भेल। चर्चाकेँ आगू बढ़बैत महासचिव मुकेश झा सदस्यता अभियानक लेल जनतासँ अपील कयलनि, जकर बाद उपस्थित सभ सदस्य उत्साहपूर्वक भूमिजा मैथिली मंचक स्थायी सदस्यता ग्रहण कयलनि।

मीडिया प्रभारी पवन ठाकुर कहलनि, “संस्थाकेँ विश्वास अछि जे एहि सदस्यता अभियानक बाद संस्थाक लेल मैथिल समाजक लोकक मदति करब आसान भऽ जायत। “

बैसारमे महासचिव आई टी उपयोगिताकेँ बढ़ावा देबा पर जोर देलनि आ कहलनि जे “संस्था जल्दिये कागजरहित कार्य प्रणाली आनत।”

उपाध्यक्ष संजीव झा आ सचिव मुन्ना झा कहलनि जे “संस्थाक वेबसाइट जल्दिये सब सदस्य लेल ऑनलाइन सदस्यता आ भुगतान प्रणाली लेल उपयोग कयल जायत।”

अध्यक्ष श्री महावीर मिश्रक नेतृत्वमे नव कार्यकारिणीक विस्तार प्रक्रियाकेँ आगू बढ़बैत गहन विचार-विमर्शक बाद आइ निम्नलिखित विभिन्न पद पर सहमति बनल-
संजय कात्यान शनिएन्क्लेव (कोषाध्यक्ष), वेटीकुंजक सुजीत चौधरी (सह-कोषाध्यक्ष), सुरजोदेवी एन्क्लेवक रमन झा (सांस्कृतिक सचिव), शनिएन्क्लेवक संजय चौधरी (संगठन सचिव), राजेन्द्र पार्कक राजेश ठाकुर (सचिव), साइकुंजक प्रभात सिंह (सह-सचिव) चुनल गेलाह।

नव कार्यकारिणी समिति निर्णय लेलक जे अगिला बैसारमे आगामी विद्यापति महोत्सव “मिथिला महोत्सव”क तिथि तय कयल जायत।

बैसारमे मुकेश झा, संजय कात्यायन, संजीव झा, पवन ठाकुर, राजेश ठाकुर, मुन्ना झा, संजय चौधरी, रमण ठाकुर, अमित झा, रमण झा, सुजीत चौधरी, बिमलेन्दु यादव, अनुपम झा, मिहिर मिश्र, सूर्यकान्त यादव, किशोर झा, अशोक ठाकुर, भारती झा, राजीव कुमार मिश्र आदि उपस्थित छलाह।