हिज्बुल्लाह नहिं चेतल तऽ बेरुतकेँ गाजा बना देब – बेंजामिन नेतन्याहू

नई दिल्ली
*
इजरायलक प्रधानमंत्री बेंजामिन नेतन्याहू गाजामे हमासक सङ्ग चलि रहल युद्धक बीच लेबनानक ईरान समर्थक हिजबुल्लाह लड़ाकू सभकेँ चेतौनी देलनि अछि। नेतन्याहू कहलनि जे हिजबुल्लाहकेँ इजरायलक सङ्ग तेसर लेबनान युद्ध शुरू नहिं करबाक चाही, अन्यथा हम लेबनानक राजधानी बेरूतकेँ गाजामे बदलि देब। नेतन्याहूक आक्रामक बयान हिजबुल्लाह द्वारा निर्देशित मिसाइल दागलाक किछु घंटा बाद आयल अछि, जाहिमे एकटा ६० वर्षीय इजरायली नागरिकक मृत्यु भऽ गेल छल। हिजबुल्लाहक लड़ाका हमासक समर्थमे लगातार हमला कय रहल अछि।
नेतन्याहू कहलनि, “जँ हिजबुल्लाह पूर्ण पैमाना पर युद्ध शुरू करबाक निर्णय लैत अछि तऽ ओ बेरूत आ दक्षिणी लेबनानकेँ गाजा आ खान यूनिसमे बदलि देत, जे एहिसँ बहुत दूर नहिं अछि। हम जीतक लेल पूरा प्रतिबद्ध छी। हम इजरायली सैनिकक मददसँ एकरा पूरा करब। नेतन्याहू सेनाक उत्तरी कमानक मुख्यालय पहुँचल छलैथ। हुनका सङ्ग इजरायलक रक्षा मंत्री योव गैलेंट आ सेना प्रमुख सेहो छलाह। नेतन्याहू सैनिकसभसँ भेंट कयलनि आ हुनक मनोबल बढ़ौलनि। ओ कहलखिन, इजरायली सैनिक उच्च उत्साहमे अछि आ सुरक्षा बहाल कऽ रहल अछि।
हमास हमलाक बाद इजरायल अपन उत्तरी क्षेत्रकेँ खाली करा लेने छल, ताकि हिजबुल्लाह सेहो एहने हमला नहि कऽ सकय। एम्हर इजरायल सरकार गाजामे मानवीय आपूर्तिकेँ तेज करबामे मदति लेल केरेम शालोम सीमा खोलबा पर सहमत भऽ गेल अछि। फिलिस्तीनीसभक सङ्ग नागरिक समन्वयक लेल इजरायलक निकाय सीओजीएटी एकटा वक्तव्यमे कहलक जे अगिला किछु दिनमे केरेम शालोम खोलल जायत। सीओजीएटीमे सिविल विभागक प्रमुख कर्नल एलाड गोरेन कहलनि जे केरेम शालोमकेँ निरीक्षणक लेल खोलल जायत आ संयुक्त राष्ट्र एजेंसीसभक निरीक्षणक बाद मानवीय सहायताक प्रवाहक अनुमति देल जायत।

७ अक्टूबरकेँ युद्ध शुरू होयबासँ पहिने केरेम शालोम क्रॉसिंगक उपयोग ६० प्रतिशतसँ बेसी ट्रककेँ गाजा दिस लऽ जयबाक लेल कयल जाइत छल।

संयुक्त राष्ट्रक सहायता प्रमुख मार्टिन ग्रिफिथ्स सेहो संवाददातासभकेँ कहलनि जे वार्ता भऽ रहल अछि आ आशाजनक संकेत भेटि रहल अछि। जिनेवासँ एकटा वक्तव्यमे ग्रिफिथ्स कहलनि, ‘एतेक दिनमे ई पहिल चमत्कार होयत जे हम देखलहुँ आ ई मानवीय कार्यक लेल लाजिस्टिक प्रक्रिया आ लाजिस्टिक आधारकेँ पैघ बढ़ावा देत। ओ इहो कहलनि जे एहिसँ गाजा पट्टीक पार ट्रकक प्रवाह बढ़त। वर्तमान सहायता मात्र रफाह सीमाक माध्यमसँ गाजा पट्टी धरि पहुँचि रहल अछि जाहिसँ भोजन, दवाई आ ईंधन सहित मानवीय सहायताक प्रवाहमे देरी भऽ रहल अछि।