कल्याण मुंबईमे जगद्गुरु शंकराचार्यक ज्ञानयज्ञ

राष्ट्रोत्कर्ष अभियान : सनातन संस्कृति रक्षार्थ राष्ट्रोत्कर्ष अभियान
*
मुंबई समदिया
हिन्दू धर्मक कल्याणार्थ एवम् सनातन संस्कृतिक संरक्षणार्थ मैथिल समाज, कल्याण एवम् समस्त सनातन धर्मावलंबीक संयुक्त तत्वावधानमे आगामी दिनांक १२ दिसम्बर, २०२३ (सोमदिन) शहाड़क (कल्याण) समीप सेंचुरी रेयान स्कूलक लगीच अवस्थित रामलीला मैदानमे “राष्ट्रोत्कर्ष अभियान यात्रा” केर अन्तर्गत धर्मसभाक आध्यात्मिक आयोजन कयल जा रहल अछि। उक्त आयोजनक विस्तृत जानकारी “जगद्गुरू शंकराचार्य स्वागत कार्यकारिणी समिति, कल्याण” केर अध्यक्ष प्रेमचन्द्र झा (प्रेमजी) देलनि। मैथिल पुनर्जागरण प्रकाश केर स्थानीय समदियाके जानकारी दैत कहलनि – “एहेन दिव्य धर्मसभा एवम् सत्संगक सुधापान करेबाक लेल सनातन संस्कृतिक ध्वजवाहक, संरक्षक एवम् प्रेरणास्रोत अनंत विभूषित प्रात:स्मरणीय जगद्गुरू स्वामी निश्चलानन्द सरस्वती महाराजक शुभागमन सँ स्थानीय तथा मुंबईक जनमानस आह्लादित छथि।”

कार्यक्रमक संयोजक बिमल कुमार झा कहलनि – “कार्यक्रम केर सफल बनेबाक लेल समितिक सचिव मणिकान्त झा एवम् कोषाध्यक्ष अशोक कुमार झा (डाकबाबू) समेत दिलीप कुमार मिश्र (सी ए), पंडित सृष्टि नारायण झा, आलोक कुमार झा, प्रमोद कुमार झा, बच्चनजी एवम् समस्त मैथिल समाजक संग सनातन धर्मावलंबी कार्यक्रमक तैयारीमे संलग्न जोर-शोरसँ लागल छथि।”

प्राप्त जानकारीक अनुसार जगद्गुरुक कार्यक्रम १२ दिसम्बर, २०२३ (मंगलदिन) प्रात:काल संगोष्ठीक संग दीक्षाक कार्यक्रम आ सायं ५ बजेसँ रात्रि ८ बजे धरि सत्संगक कार्यक्रम निश्चित कयल गेल अछि। दोसर दिन अर्थात् १३ दिसम्बर, २०२३ (बुधदिन) प्रात: ११ बजेसँ संगोष्ठी एवम् दीक्षा कार्यक्रम होयत। मैपुप्र केर माध्यमसँ समितिक द्वारा ई आह्वान कयल जा रहल अछि कि एहि धार्मिक अनुष्ठानमे समस्त सनातन धर्मावलंबीसँ साग्रह अनुरोध अछि जे विपुल संख्यामे सपरिवार, बन्धु-बान्धव समेत उपस्थित भऽ अपन आध्यात्मिक उन्नतिक सर्वश्रेष्ठ लाभ प्राप्त करैत कार्यक्रमकेँ सफल बनाबी।