संसदक दुनू सदन आइ 11 बजे धरि स्थगित
नई दिल्ली। समदिया
संसदक दुनु सदनमे भारी हंगामाक कारण मानसून सत्रक दोसर दिन कोनो काज नहि भ सकल। लगातार हंगामा आ नारेबाजीक बीच लोकसभा आ राज्यसभा दुनू ठाम 22 जुलाई बुधदिन दिन 11 बजे धरि कार्यवाही स्थगित कय देल गेल।विपक्षक कहनाय अछि जे ओ संसदमे नीट परीक्षा, पेपर लीक आओर जंतर मंतरमे विरोध करय वला छात्रक संबंधमे मुद्दा उठाओल जाय। ओतहि राज्यसभामे उपाध्यक्ष विपक्षसँ आग्रह कयलनि जे ओ व्यवस्था कायम राखथि आ नियमक अनुसार कार्यवाही जारी रखबाक अनुमति देथि। मुदा दुनू सदनमे हंगामा बनल रहल, जाहिसँ बुधदिन धरि कार्यवाही स्थगित भ गेल। मंगलदिन भोर 11 बजे कार्यवाही शुरू भेलाक किछुए देर बाद विपक्ष नीट परीक्षा आ पेपर लीक पर चर्चा करबाक मांग कयलक। राज्यसभामे विपक्षक नेता मल्लिकार्जुन खड़गे एहि मामिला पर अपन विचार रखलथि, मुदा ओकर तुरंत बाद हंगामा कयल गेल, जाहिसँ कार्यवाही जल्दी स्थगित करय पड़ल। साफ-साफ देखल गेल जे विपक्ष संसदमे कार्यवाही नहि होमय देबाक मूडमे अछि। राज्यसभाक कार्यवाही शुरूमे 12 बजे धरि स्थगित भ गेल छल, मुदा सदनक फेरसँ बैसार भेला पर व्यवधान जारी रहल, फलस्वरूप कार्यवाही 2 बजे धरि स्थगित भ गेल। 2 बजे हंगामा जारी रहलाक कारण सदनक अगिला दिन, बुध दिन धरि स्थगित कय देल गेल। कांग्रेसक सांसद सहित विपक्षी सांसद राज्यसभामे नियम 267 केर तहत नोटिस जमा कय नियमित काज स्थगित कयने छलाह। ई सांसद नीट-यूजी मुद्दा आओर पेपर लीक कांड पर तत्काल चर्चा केर मांग कय रहल छल। सत्र शुरू होइते विपक्षी सांसद सभ विभिन्न मुद्दा पर विरोध करैत सदनक वेलमे प्रवेश कयलनि। नारा लगा कय सरकारक खिलाफ अपन विरोध दर्ज करा देलनि।
हंगामाक कारण दुनू सदनमे प्रश्नकाल आ सूचीबद्ध विधायी काज नहि भ सकल। पीठासीन अधिकारी कतेको बेर सदस्यसँ अपन-अपन सीट पर लौटबाक आ सदनक कार्यवाही सुचारु रूपसँ चलय देबाक अपील कयलनि, मुदा विपक्षी सांसदक हंगामाक चलते कार्यवाही आगू नहि भ सकल।
इ मानसून सत्रक दोसर दिन छल आ लगातार दोसर दिन संसदक कार्यवाही हंगामाक भेंट चढ़ल। सरकार जतय अपन विधायी एजेंडाकेँ आगू बढ़ाबय चाहैत छल, ओतय विपक्ष विभिन्न मुद्दा पर चर्चाक मांगकेँ ल कय आक्रामक रुख अपनौने अछि। एहनमे मानसून सत्रक आगामी दिनमे सेहो सरकार आ विपक्षक बीच तीखी टकरावक स्थिति बनय रहबाक संकेत अछि। मतलब साफ अछि जे संसदमे आइ सेहो कोनो काज नहि होयत। ओना प्रतीक्षा करू जे आइ दिन 11 बजे केर बाद की होयत।
