कांग्रेसक भारत जोड़ो न्याय यात्रा बृहस्पति दिन असममे प्रवेश कयलक। राहुल गाँधी असम सरकार पर कटाक्ष करैत कहलनि जे ई देशक सबसँ भ्रष्ट सरकार अछि।
असममे यात्राक आरम्भक उपलक्ष्यमे शिवसागर जिलामे झण्डा हस्तान्तरण समारोह आयोजित कयल गेल, जाहिसँ यात्राकेँ औपचारिक रूप देल गेल।
राहुल गांधी कहलनि जे “भाजपा-आरएसएस देश आ हर राज्यमे अन्याय कऽ रहल अछि। चाहे ओ राजनीतिक, सामाजिक या आर्थिक अन्याय हो। मणिपुरक नागरिक संघर्षक सामना कऽ रहल अछि। प्रधानमंत्री मोदी एखन धरि एहि क्षेत्रक दौरा नहिं कयने छथि।
नागालैंडमे प्रधानमंत्री महत्वपूर्ण वादा कयने छलथि। नौ साल पहिने ओ सभ रूपरेखा समझौता पर हस्ताक्षर केलखिन। आइ नागालैंडक बहुत रास लोक उत्सुक छथि जे ओहि व्यवस्थाक की भेल।
असम सेहो एहने परिस्थितिक सामना कऽ रहल अछि। असममे यकीनन भारतक सबसँ भ्रष्ट सरकार अछि। नागालैंडमे हमरा बहुत नीक प्रतिक्रिया भेटल आ हम असममे सेहो एहने अपेक्षा कऽ रहल छी।”
कांग्रेसक एकटा वरिष्ठ नेता कहलनि जे आदरणीय असमिया संत श्रीमंत शंकरदेव सबकेँ एक संग अनबाक प्रयास कयने छलाह आ ‘भारत जोड़ो न्याय यात्रा’ सेहो वैह काज कऽ रहल अछि। असम कांग्रेसक सांसद गौरव गोगोई कहलनि जे ई यात्रा आ गाँधीक उपस्थिति राज्यक जनताकेँ एकटा नव आशा देलक अछि।
अपन समस्याक कारण असमक लोक ई जानबा लेल उत्सुक छथि जे राहुल गाँधी कहिया एहि क्षेत्रक दौरा करथि। हमर पार्टी भारतीय संविधानक समर्थन करैत अछि। भाजपाक मानब छनि जे आब ओ शंकराचार्यसँ बेसी विद्वान भऽ गेल अछि। हुनका सभमे बहुत अहंकार अछि।
बृहस्पतिसँ भारत जोड़ो न्याय यात्रा आठ दिनमे असमक १७ जिलासँ गुजरत। राहुल गाँधी मणिपुरसँ यात्राक शुरुआत कयलनि आ दोसर पड़ाव नागालैंडमे छल।
