अपराध हाजीपुर व्यवहार न्यायलयक एकटा मुंशीक हत्या Maithil Punarjagran Prakash January 18, 2024 0 Comments वैशाली समदिया * बिहारक वैशालीमे हाजीपुर कोर्टक एकटा मुंशीक गोली मारि हत्या कऽ देल गेल। निडर अपराधी लोकनि दिनदेखारे एहि घटनाकेँ अंजाम देलनि। ई घटना हाजीपुर-मुजफ्फरपुर एनएच 22 पर सराय थाना क्षेत्रक लाल कोठी ढाबा लग भेल। कहल जा रहल अछि जे हाजीपुर क्रिमिनल कोर्टक मुंशी रंजन कोर्ट आबय लेल अपन घरसँ चललाह। एम्हर बाइकसँ आयल उपद्रवी लोकनि हुनका बाटमे रोकि देलनि आ गोली चला कऽ भागि गेलाह। हुनका तुरन्त अस्पताल पहुँचाओल गेल मुदा बहुत देर भऽ चुकल छल। डॉक्टर हुनका मृत घोषित कए देलखिन। वैशालीमे अदालतक मुंशीकेँ सार्वजनिक रूपसँ गोली मारलाक बाद अपराधी लोकनि घटनास्थलसँ भागि गेल। मृतक अदालतक मुंशिक पहिचान महुआ थाना क्षेत्रक पहाड़पुरक निवासी रंजन कुमारक रूपमे भेल अछि। रंजन मुजफ्फरपुर लॉ कॉलेजसँ कानूनक अध्ययन सेहो करैत छलाह। कहल जा रहल अछि जे रंजन अपन एकटा सहयोगी अनिल कुमार सिंहक संग बाइक पर हरदम जकाँ अपन घरसँ अदालतमे आबि रहल छलाह। एम्हर पीछा करय बला अपराधी सभ लाल कोठी ढाबा लग रोकि देलक आ रंजनक सहयोगीकेँ बाइकसँ उतारि रञ्जनकेँ छातीमे गोली मारि देलक। रञ्जनकेँ तुरन्त सदर अस्पताल लऽ जायल गेल, जतय चिकित्सक हुनका मृत घोषित कऽ देलनि। घटनाक सूचना भेटैत सदर एसडीपीओ ओम प्रकाश घटनास्थल पर पहुँचलाह। ओ कहलनि जे सीसीटीवी स्कैन कयल जा रहल अछि आ मामिलाक जाँच कयल जा रहल अछि। रञ्जनक किछु दिन पहिने गामक किछु लोकक सङ्ग विवाद भेल छल, तेँ आपसी प्रतिद्वंद्वितामे एहि घटनाकेँ अंजाम देबाक सम्भावना अछि। Spread the love
