इजरायलक मंत्रिमंडल युद्धविराम आ गाजा पट्टीमे हमासक सङ्ग बंधकसभक रिहाईक लेल एकटा समझौताकेँ मंजूरी देलक अछि। प्रधानमन्त्री बेंजामिन नेतन्याहूक कार्यालय आइ शनिदिन घोषणा कयलक जे ई समझौता रविदिनसँ लागू कयल जायत। शनिदिन भोरमे छओ घंटाक लम्बा बैसारक बाद सरकार ओहि समझौताकेँ मंजूरी देलक जे १५ मास पुरान एहि संघर्षकेँ समाप्त करबाक मार्ग प्रशस्त कयलक।
नेतन्याहूक कार्यालय कहलक, “सरकार बंधकसभक वापसीक समझौताकेँ मंजूरी देलक अछि, जे रविदिनसँ प्रभावी होयत।” यद्यपि, गाजामे युद्धविराम समझौताक अछैतो इजरायली वायुसेना अपन हमला जारी रखलक अछि।
एहि समझौताक अन्तर्गत युद्धविरामकेँ तीन चरणमे लागू कयल जायत। पहिल चरणमे इजरायलमे कैद १९ सालसँ कम आयुक सभ फिलिस्तीनी महिला आ बच्चासभकेँ छह सप्ताह तक रिहा कयल जायत। बदलामे हमास ९८ इजरायली बंधकमे सँ ३३ केँ रिहा कऽ देत, जाहिमे महिला, बच्चा आ ५० वर्षसँ बेसी आयुक पुरुष शामिल छथि। शनिदिन इजरायलक न्याय मंत्रालय ओहि ९५ फिलिस्तीनी कैदीसभक नाम जारी कयलक जकरा रविदिन रिहा कयल जायत।
समझौताक अन्तर्गत प्रत्येक सात दिनमे किछु आओर बंधककेँ छोड़ि देल जायत। इजरायली मंत्रिमंडलक किछु मंत्री एहि समझौताक विरोध कयलनि। २४ मंत्री एहि समझौताक पक्षमे मतदान कयलनि, जखन कि आठ गोटे एकर विरोध कयलनि।
गाजामे युद्धक कारण एखनि धरि ४६,००० सँ बेसी लोकक मृत्यु भऽ चुकल अछि आ २३ लाखक आबादी विस्थापित भऽ चुकल अछि। लोक भूख, सर्दी, आ बीमारीसँ जूझि रहल अछि। समझौताक अन्तर्गत गाजाकेँ राहत सामग्रीक आपूर्ति बढ़ाओल जायत। अन्तर्राष्ट्रीय एजेंसीसभ भोजन, ईंधन आ दवाइ पहुँचेबाक लेल तैयार अछि।
संयुक्त राष्ट्र राहत आ निर्माण एजेंसी (यूएनआरडब्ल्यूए) शुक्रकेँ सूचना देलक जे हुनका लग ४,००० ट्रक राहत सामग्री तैयार अछि, जाहिमेसँ आधा खाद्य पदार्थ अछि। गाजाक लोककेँ आशा अछि जे ई युद्धविराम हुनक जीवन आसान बना देत। विस्थापित फिलिस्तीनी रीहम शेख अल-ईद कहलनि, “हम चाहैत छी जे एहि समझौताकेँ लागू कयल जाय जाहिसँ हम अपन घरमे खाना बना सकी आ भनसाघरमे नमगर कतारमे ठाढ़ होयबासँ बचि सकब।”