भारतीय क्रिकेट कंट्रोल बोर्ड (बीसीसीआई) आईसीसी चैंपियंस ट्रॉफी लेल भारतीय टीमक घोषणा कऽ देलक अछि। रोहित शर्माकेँ एक बेर फेर कप्तानी सौंपल गेल अछि। युवा बल्लेबाज शुभमन गिलकेँ उप कप्तान बनाओल गेल अछि।
रोहित शर्माक कप्तानी हालेमे टेस्ट क्रिकेटमे खराब फॉर्मक कारण आलोचनाक केन्द्रमे रहल अछि। एकर अतिरिक्त, विराट कोहलीक फॉर्म सेहो चिन्ताक विषय रहल अछि। यद्यपि, बीसीसीआइ एक बेर फेर आईसीसीक प्रमुख टूर्नामेंटक लेल एहि वरिष्ठ खेलाड़ीसभक अनुभवपर भरोसा रखलक अछि। रोहितक कप्तानीमे भारत २०२४मे टी-२० विश्व कप जितलक। विराट कोहली सेहो एहि टीमक हिस्सा छलाह। दुनू दिग्गज विश्व कप जीतलाक बाद टी-२० अंतर्राष्ट्रीय क्रिकेटसँ संन्यासक घोषणा कयलनि।
चैंपियंस ट्रॉफी लेल रोहित शर्मा आ विराट कोहलीक अतिरिक्त श्रेयस अय्यर, केएल राहुल, आ यशस्वी जायसवाल सन शीर्ष क्रमक बल्लेबाजकेँ सेहो शामिल कयल गेल अछि। एम्हर हरफनमौला हार्दिक पांड्या स्वाभाविक वापसी भेल अछि। एकर अतिरिक्त विकेटकीपर-बल्लेबाज ऋषभ पंत सेहो टीमक हिस्सा छथि। बाम हाथक हरफनमौला अक्षर पटेल आ रविन्द्र जडेजा सेहो टीमक हिस्सा छथि। हुनकालोकनिक सङ्ग वाशिंगटन सुन्दरकेँ एकटा आओर ऑलराउंडरक रूपमे शामिल कयल गेल अछि।
गेंदबाजी विभागक मामिलामे अक्षर, सुन्दर आ जडेजाक अतिरिक्त कुलदीप यादव स्पिन विभागक नेतृत्व करताह। तेज आक्रमणक नेतृत्व स्टार तेज गेंदबाज जसप्रीत बुमराह करताह, जे बॉर्डर-गावस्कर ट्रॉफीमे शानदार प्रदर्शन कयलनि। एकर अतिरिक्त, अनुभवी मोहम्मद शमी बहुत दिनक बाद अंतर्राष्ट्रीय क्रिकेटमे वापसी कयलनि अछि। शमी-बुमराहक जोड़ीक अतिरिक्त अर्शदीप सिंह सेहो तेज गेंदबाजी विभागक जिम्मेदारी लेताह।
भारतीय क्रिकेट टीमकेँ चैंपियंस ट्रॉफीक लेल ग्रुप ‘ए’मे राखल गेल अछि, जे पाकिस्तान आ दुबईमे आयोजित होयत। समूह ए मे भारत, पाकिस्तान, बांग्लादेश, आ न्यूजीलैण्ड सम्मिलित अछि। भारत अपन अभियानक शुरुआत २० फरवरीकेँ दुबई अन्तर्राष्ट्रीय स्टेडियममे बांग्लादेशक विरुद्ध करत।
चैंपियंस ट्रॉफी लेल भारतीय क्रिकेट टीम -: रोहित शर्मा (कप्तान), शुभमन गिल, विराट कोहली, श्रेयस अय्यर, केएल राहुल (विकेटकीपर), ऋषभ पंत (विकेटकीपर), हार्दिक पांड्या, अक्षर पटेल, वाशिंगटन सुंदर, कुलदीप यादव, जसप्रीत बुमराह, मोहम्मद शमी, अर्शदीप सिंह, यशस्वी जायसवाल, रवींद्र जडेजा।