अमरनाथ यात्रा शनिदिनसँ शुरु भेल। तीर्थयात्रीसभक दोसर जत्था भारी सुरक्षाक बीच गुफा तीर्थमे दर्शन करबाक लेल जम्मूसँ प्रस्थान कयलक। प्रधानमंत्री नरेन्द्र मोदी आ भाजपा अध्यक्ष जेपी नड्डा वार्षिक अमरनाथ यात्रा शुरू भेला पर तीर्थयात्रीसभकेँ बधाई देलनि।
पीएम मोदी अपन सोशल मीडिया एक्स (पहिने ट्विटर) पर लिखलनि, “पवित्र अमरनाथ यात्रा शुरू भेला पर सभ तीर्थयात्रीकेँ हार्दिक बधाई। बाबा बर्फानीक दर्शन आ पूजासँ जुड़ल ई यात्रा शिव भक्तसभमे अपार ऊर्जा संचारित करयवाला होइत अछि। हुनक कृपासँ सभ भक्तक कल्याण होय, यैह इच्छा अछि। जय बाबा बर्फानी!”
भाजपाक राष्ट्रीय अध्यक्ष जेपी नड्डा लिखलखिन, “आइ श्री अमरनाथ यात्रा शुरू होबए केर शुभ अवसर पर हम देवाधिदेव महादेव जी के दर्शनक लेल निकलय वाला सब तीर्थयात्रीकेँ हार्दिक बधाई दैत छी। हमर सनातन संस्कृतिमे एहि पुण्य यात्राक सौभाग्य धन्य अछि। हम प्रार्थना करैत छी जे ई सभक जीवनकेँ सुख-सौभाग्य आ समृद्धिसँ पूर्ण करय। जय बाबा बर्फानी।”
अधिकारी लोकनि कहलनि जे ४,०२९ तीर्थयात्रीक दोसर जत्था जम्मूक भगवती नगर यात्री निवाससँ कश्मीर घाटीक लेल रवाना भेल, जाहिमे २०० वाहनक दूटा सुरक्षा काफिला छल, एहिमेसँ १,८५० यात्री भोर ४ बजे १०४ गाड़ीमे बालटाल आधार शिविर लेल प्रस्थान कयलनि आ २,१७९ यात्री भोर ४.३० बजे पहलगामक नुनवान आधार शिविर लेल ९६ वाहनसँ प्रस्थान कयलनि। दुनू काफिला केर सुरक्षा देल जा रहल अछि।
५२ दिन धरि चलयवला अमरनाथ यात्रा १९ अगस्तकेँ समाप्त होयत। यात्राकेँ देखैत सुरक्षाक व्यापक प्रबन्ध कयल गेल अछि।
