मुंबई उपनगर, विरार पूर्वमें (फुलपाड़ा) मे सात दिवसीय श्रीमद भागवत सप्ताह कथा ज्ञान यज्ञ

मुंबई समदिया

*

मुंबई उपनगर अंतर्गत फुलपाड़ा विरार (पूर्व) में चलि रहल सात दिवसीय श्रीमद भागवत सप्ताह कथा ज्ञान यज्ञ, शनिदिन अति उल्लासपूर्ण वातावरणमे संपन्न भेल। भागवत प्रचार सेवा प्रतिष्ठान द्वारा, हर वर्षक भांति एहि वर्ष सेहो श्रीमद्भागवत सप्ताह कथा यज्ञक आयोजन कएल गेल अछि। भागवत कथामे वर्णित तमाम तथ्यक व्याख्या, भागवताचार्य श्री राजीव कृष्णजी महाराजक मुखारवृंदसँ उपस्थित भक्त लोकनि श्रवण कएलनि। श्री राजीव कृष्णजी महाराज, विगत सात दिनसँ भगवान श्री कृष्णक वात्सल्य प्रेम, असीम प्रेमक अतिरिक्त हुनका द्वारा कएल गेल विभिन्न लीलाक वर्णन क’ वर्तमान समयमे समाजमे व्याप्त अत्याचार, अनाचार, कटुता, केर दूर क’ सुंदर समाजक निर्माणके लेल उपस्थित भक्त लोकनिकेँ प्रेरित कएलनि। एहि सातदिवसीय धार्मिक अनुष्ठानके अवधिमे व्यास पीठ पूजन, भगवत माहात्म्, भीष्मप्रयाग, कपिल अवतार, ध्रुव चरित्र, वामन अवतार, राम कृष्ण जन्म एवं कृष्ण जन्मोत्सव, भगवन श्रीकृष्ण लीला, दर्शन एवं गोवर्धन पूजा, गोपी उद्धव संवाद, रुक्मणि विवाह, सुदामा चरित्र एवं परीक्षित मोक्षक संग श्रीमद्भागवत सप्ताह विसर्जन संपन्न भेल। कथावाचनके क्रममे श्री राजीवकृष्णजी महाराज, सुंदर समाज निर्माणके लेल गीतासँ अनेको उपदेशक माध्यमे ओहि अनुरूप आचरण करबाक लेल उपस्थित लोककेँ प्रेरित सेहो कएलनि। अप्पन उपदेशक क्रममे कहलनि कि, जे कार्य प्रेमक माध्यमे संभव अछि, ओ हिंसासँ कखनहुँ संभव नहि होइत अछि। समाजमे मात्र किछुए लोक अप्पन नीक कर्म द्वारा सदैव चिर स्मरणीय होइत छथि। एहि सात दिवसीय भागवत कथाक अवधिमे सम्पूर्ण वातावरण भक्तिमय रहल। एहि भक्तिमय कार्यक्रमक आयोजन भागवत प्रचार सेवा प्रतिष्ठान द्वारा कएल गेल आ मुख्य यजमान छलाह धनंजय भोगेन्द्र झा। धनंजय झा अप्पन संदेशमे कहलनि कि, एहि आयोजनक मुख्य संरक्षक छलथि प्रवीणा हितेंद्र ठाकुर संगहि एहि आयोजनमे विशेष सहयोगकर्ताक रूपमे बहुजन विकास अघाड़ी एवं मिथिलांचल सांस्कृतिक समाज सेवा ट्रस्ट तत्पर रहल। एहि भक्ति कार्यक्रममे स्थानीय सेवाधारी सेहो निरंतर अप्पन सहभागिता प्रस्तुत करैत रहलाह।