एसके चौधरी शिक्षा न्यास द्वारा बेनीपट्टी प्रखंड क्षेत्र चानपुरा बसैठमे संचालित कृषि विज्ञान केंद्रमे तीन – दिवसीय अंतर्राष्ट्रीय कृषि, शिक्षा एवं स्वास्थ्य अमृत महोत्सव सह मेगा एग्री एक्सपो 2024 केर आयोजन आबए वला 9, 10 आ 11 फरवरी कय होयत। एहि 8म अंतर्राष्ट्रीय कांफ्रेंसक आयोजनक तैयारी कृषि विज्ञान केंद्रमे युद्धस्तर पर चलि रहल अछि। एहि के ल’ कृषि विज्ञान केंद्र भवन आर प्रांगणकेँ दुल्हिन जकां सजाओल जा रहल अछि। केंद्र प्रांगणमे भव्य आ आकर्षक पंडालक निर्माणमे मजदूर दिन-राइतक जुटल अछि। एहि संबंधमे रवि दिन कृषि विज्ञान केंद्रक प्रांगणमे जनतब दैत एसके चौधरी शिक्षा न्यासक न्यासी डॉ. संत कुमार चौधरी पत्रकार सभकेँ कहलैन्ह जे एहि तीन दिवसीय कार्यक्रमक प्रथम दिनक उद्घाटन 9 फरवरी कय बिहारक राज्यपाल राजेंद्र विश्वनाथ अर्लेकर करताह। एहि केंद्रमे राज्यपाल सङ्ग विश्वक लगभग 40 देशक प्रतिनिधि, वैज्ञानिक सबहक आगमन होमय वला अछि। जिनकर स्वगत आ कार्यक्रमक सफलता के ल’ व्यापक तैयारी कयल जा रहल अछि। शिक्षा न्यासी डॉ. चौधरी कहलैन्ह जे हम कृषि, शिक्षा आ स्वास्थ्य विकासमे लागल छी। हम किसानक स्वास्थ्य पर सेहो ध्यान दय रहल छी। किसानक कृषि पर आर छात्रक शिक्षा पर विशेष जनतब देल जाएत। एहि क्रममे निःशुल्क नेत्र चिकित्सा शिविरक आयोजन सेहो कयल जाएत। जरूरत मंद लोकक आंखिक ऑपेरशन मुफ्तमे संस्थान दिससँ कयल जाएत। भारत आ बिहार सरकारक सहयोगसँ आयोजित होमय वला तीन दिवसीय अंतर्राष्ट्रीय कार्यक्रममे देश, प्रदेश आर जिलाक पुलिस प्रशासनिक अधिकारी, जनप्रतिनिधि आ राजनेता शामिल हेताह। एहि अवसर पर ई. डॉ. राहुल चौधरी, कॄषि वैज्ञानिक ईश्वरचंद्र झा, डॉ मंगलानंद झा, डॉ प्रमोद कुमार झा उपस्थित छलाह।
