भारत आ चीन पूर्वी लद्दाखमे जमीनी स्तर पर “शान्ति” बनाकऽ रखबाक लेल सहमत भेल अछि। चुशुल-मोल्दो सीमा पर कोर कमांडर स्तरक २१म दौरक बैसारमे दुनू पक्ष एहि पर सहमत भेल।
विदेश मंत्रालय बुधदिन कहलक जे ई बैसार सोमदिन भेल छल।
मंत्रालय कहलक, “पछिला चरणक चर्चामे भारत-चीन सीमा क्षेत्रमे शान्ति आ स्थिरता बहाल करबाक लेल आवश्यक आधारक रूपमे पूर्वी लद्दाखमे एलएसी (वास्तविक सीमा रेखा)क सङ्ग शेष क्षेत्रमे शत्रुता पूर्ण रूपसँ समाप्त करबाक मांग कयल गेल छल। दुनू पक्ष अपन दृष्टिकोण साझा कयलक। वार्ता मैत्रीपूर्ण आ सौहार्दपूर्ण वातावरणमे भेल।
“दुनू पक्ष प्रासंगिक सैन्य आ कूटनीतिक तंत्रक माध्यमसँ सेहो भविष्यमे संचार बनाकऽ रखबाक लेल सहमत भेल अछि। एम्हर ओ सभ सीमावर्ती क्षेत्रमे जमीनी स्तर पर शान्ति कायम रखबाक लेल सेहो प्रतिबद्धता जतौलनि।”
रक्षा विशेषज्ञक अनुसार, दुनू पक्ष पश्चिमी क्षेत्रमे जमीनी स्तर पर सुरक्षा आ स्थिरता बनाकऽ रखबाक लेल सहमत भेल। दुनू पक्ष निकट संपर्कमे रहब आ सैन्य तथा राजनयिक चैनलक माध्यमसँ बातचीत बनने राखब एवं शेष मुद्दाक जल्दीसँ जल्दी पारस्परिक रूपसँ स्वीकार्य समाधान निकालबा पर सहमत भेल।
