बिहारमे एनडीए सरकारक गठनक बाद सहयोगी दल द्वारा ‘दबावक राजनीति’ शुरू भऽ गेल अछि। जतय हिन्दुस्तानी अवाम मोर्चाक जीतन राम माँझी दूटा मंत्री पदक माँग कऽ रहल छथि, ओतहि लोजपा (राम विलास) सेहो ११ निर्वाचन क्षेत्रमे लोकसभा चुनाव प्रभारीक घोषणा कयलक अछि, जे कि एक तरहसँ सीटक दावेदारी कयल गेल अछि।
पूर्व मुख्यमंत्री जीतन राम मांझीक पार्टी ‘हम’ केर चारिटा विधायक अछि। माँझी जतेक गठबंधनमे रहल छथि, हुनक पहिचान दबावक राजनीति करब रहल अछि।
मांझी जतय कैबिनेटमे दूटा मंत्रीक मांग कऽ रहल छथि, ओतहि कैबिनेटमे जगह भेटल हम नेता संतोष कुमार सुमन सोमदिन मुख्यमंत्री नीतीश कुमारसँ भेंट कयलथि।
एतय लोकसभा चुनावक संबंधमे राजगमे सीटक बंटवारा नहिं भेल अछि, मुदा लोजपा (राम विलास) राज्यक ११ लोकसभा सीटपर लोकसभा चुनावक तैयारीक लेल प्रभारीक घोषणा कयलक अछि।
पार्टी हाजीपुर, जमुई, खगड़िया, समस्तीपुर, वैशाली, नवादा, गोपालगंज, सीतामढ़ी, वाल्मीकिनगर, जहानाबाद आ बेगूसरायमे प्रभारीकेँ नियुक्ति कयलक अछि।
मानल जा रहल अछि जे लोजपा (राम विलास) एहि सीट पर दावा पेश कयलक अछि। चिरागक काका पशुपति पारस स्वयं हाजीपुरसँ सांसद छथि।
यद्यपि, पार्टीक नेता एहि मामिला पर बेसी खुलि कऽ नहिं बाजि रहल छथि।
पार्टीक एकटा नेता नाम उजागर नहि करबाक शर्तपर कहलनि जे पार्टी एहि सीटसभपर चुनावक तैयारी कऽ रहल अछि। सीटक बँटवारा एखन धरि नहिं भेल अछि, पार्टी केर जतेक सीट भेटत ओहिसँ चुनाव लड़त। पछिला लोकसभा चुनावमे लोजपा छओ सीट जीतल छल। मुदा एहि सालक चुनावमे स्थिति बदलि जायत। लोजपामे दूटा गुटक गठन सेहो भेल अछि, जखन कि पछिला चुनावसँ राजगमे सहयोगी दलक संख्या सेहो बढ़ि गेल अछि।
