आईएसआई समर्थित शहजाद भट्टी नेटवर्क ध्वस्त, 14 राज्यमे 200 सँ बेसी गिरफ्तार
नई दिल्ली । समदिया
स्वतंत्रता दिवससँ पहिने सुरक्षा एजेंसिसँ पाकिस्तानक कथित खुफिया एजेंसी आईएसआई समर्थित शहजाद भट्टी नेटवर्कक विरुद्ध देशव्यापी कार्रवाई कऽ ओकर नेटवर्क ध्वस्त करबाक दावा कएल गेल अछि। केंद्रीय गृह मंत्री अमित शाह सोमदिन कहलनि जे 14 राज्यमे समन्वित अभियान चला कऽ 200 सँ बेसी लोककेँ गिरफ्तार कएल गेल अछि आ संभावित आतंकी हमलाक योजना विफल कऽ देल गेल अछि।
गृह मंत्री अमित शाह सोशल मीडिया प्लेटफॉर्म ‘एक्स’ पर कहलनि जे मोदी सरकारक नेतृत्वमे सुरक्षा एजेंसिसँ पाकिस्तानक आईएसआई समर्थित आतंकी नेटवर्कक विरुद्ध निर्णायक कार्रवाई कएल गेल अछि। अभियानक दौरान आईईडी, पाकिस्तान ऑर्डनेंस फैक्ट्रीक निशान वाला ग्रेनेड, पिस्तौल, जिंदा कारतूस आ कथित जासूसीमे इस्तेमाल होबयवाला सीसीटीवी कैमरा सहित अन्य सामग्री बरामद करबाक बात कहल गेल अछि।
शाह कहलनि जे देशभरिमे भेल ई कार्रवाई आतंकवादक प्रति भारतक ‘जीरो टॉलरेंस’ नीतिकेँ दर्शाबैत अछि। हुनकर अनुसार, ई नेटवर्क विभिन्न आतंकी गतिविधिमे संलिप्त रहल अछि।
असममे सामने आयल नेटवर्कक कड़ी
एहि नेटवर्कक जांचक क्रममे असममे सेहो महत्वपूर्ण कार्रवाई भेल छल। 25 जुलाईकेँ असम पुलिस बतौने छल जे स्पेशल टास्क फोर्स धुबरी, चिरांग आ बारपेटा पुलिसक सहयोगसँ पाकिस्तान स्थित नेटवर्कसँ कथित रूपसँ जुड़ल तीन लोककेँ गिरफ्तार कएलक।
24 जुलाईकेँ खुफिया सूचनाक आधार पर भेल कार्रवाईमे पाँच मोबाइल फोन, सात सिम कार्ड, आधार कार्ड, बैंक पासबुक, डेबिट कार्ड आ अन्य दस्तावेज बरामद कएल गेल छल।
असम एसटीएफक वरिष्ठ पुलिस अधीक्षक प्रणब कुमार पेगूक अनुसार, नेटवर्क पर भर्ती, ऑनलाइन कट्टरपंथ, रेकी, लॉजिस्टिक्स, जासूसी, अवैध हथियारक व्यवस्था, स्लीपर सेल तैयार करब आ देशक विभिन्न भागमे आतंकी गतिविधि करबाक लेल सहयोग देबाक आरोप अछि।
एन्क्रिप्टेड माध्यमसँ पाकिस्तान स्थित हैंडलरक संपर्कक आरोप
पुलिस अधिकारीक अनुसार, नेटवर्क एन्क्रिप्टेड संचार माध्यमक जरिए पाकिस्तानमे स्थित हैंडलरक निर्देश पर काज करैत छल। जांचमे कथित रूपसँ किछु फ्रंट संगठनसँ सेहो एकर संबंधक जानकारी सामने आयल अछि।
अधिकारीक अनुसार, जांचमे खालिस्तान आर्म्ड फोर्स, पंजाब सॉवरेनिटी अलायंस, खालिस्तान लिबरेशन आर्मी, शेर-ए-पंजाब ब्रिगेड, यूनाइटेड सिख ब्रदरहुड, सिख टाइगर्स ऑफ खालिस्तान आ तहरीक-ए-तालिबान हिंदुस्तान (टीटीएच) सहित विभिन्न संगठनक नाम सामने आयल अछि।
पुलिसक आरोप अछि जे एहि संगठनक उपयोग नेटवर्कक वास्तविक संरचना आ सीमा पार संबंधकेँ नुकेबाक लेल कएल जाइत छल। टीटीएच पर 22 फरवरी आ 24 मई 2026 केँ पंजाब पुलिसक दू कर्मीक लक्षित हत्या करबाक जिम्मेदारी लेबाक आरोप सेहो लगाओल गेल अछि।
असमक नलबाड़ीमे भेल एकटा जांचक दौरान पुलिसकेँ एहि नेटवर्कक संबंधमे पहिल जानकारी भेटल छल। एकर बाद 22 मईकेँ एकटा आरोपीकेँ गिरफ्तार कएल गेल छल।
सुरक्षा एजेंसीक एहि देशव्यापी कार्रवाईकेँ स्वतंत्रता दिवसक पूर्व संभावित आतंकी साजिशक विरुद्ध महत्वपूर्ण अभियानक रूपमे देखल जा रहल अछि।
