पटना हवाई अड्डा पर एकटा नव आ पैघ सुविधा शुरू भेल अछि। आब यात्री सभक लेल एम्बुललिफ्ट उपलब्ध होयत। एहिसँ बुजुर्ग, बीमार आ विकलांग यात्रीकेँ लाभ होयत। एहि सुविधाक लाभ पटनासँ आबयवला दुनू पक्षक यात्री उठा सकैत छथि। एम्बुलिफ्टक लेल बहुत मामूली किराया देबय पड़त।
पटना हवाई अड्डा पर यात्री सुविधाक लगातार विस्तार कयल जा रहल अछि। राजधानी पटनाक लोकनायक जय प्रकाश नारायण अन्तर्राष्ट्रीय हवाई अड्डा पर एम्बुलिफ्ट सेवा शुरू भऽ गेल अछि। जाहि यात्रीकेँ चलबामे कठिनाई होइत छैक वा जे विकलांग छथि ओ एम्बुलिफ्टक सुविधाक लाभ उठा सकैत छथि। पटना हवाई अड्डासँ यात्रा करैवला विकलांग लोक, बीमार आ बुजुर्गकेँ आब उड़ानमे चढ़बामे कोनो समस्या नहि होयत। एकरा लेल मात्र १०० टाका देबय पड़त।
हवाई अड्डाकेँ २०२२ मे एम्बुलिफ्ट सेवा शुरू करबाक छल, जे आब शुरू कए देल गेल अछि। भारतीय विमानपत्तन प्राधिकरण ‘सुगम भारत अभियान’क अन्तर्गत पटना हवाई अड्डा पर एम्बुलिफ्ट योजना लागू कयलक अछि।
एहि सुविधाक लाभ लेबाक लेल यात्रीकेँ सम्बन्धित एयरलाइन्सकेँ अलग-अलग फोन करय पड़त आ १०० रुपैया शुल्क देबय पड़त। एहिमे एक बेरमे पाँच यात्रीक क्षमता अछि। एम्बुलिफ्ट एप्रन लग रहत। एतयसँ यात्री चढ़त आ सीधा विमानमे जायत। व्हील चेयरसँ विमानक भीतर पहुँचबामे बहुत कठिनाई होइत छल। गिरए केर डर सेहो रहैत छल। मुदा एम्बुलिफ्टसँ इ नहिं होएत। यात्री आब व्हीलचेयरसँ एप्रन धरि यात्रा कऽ ओतय एम्बुलिफ्टमे चढ़ि विमानक भीतर पहुंच जाएत।
हवाई अड्डाक निदेशक अंचल प्रकाश कहलनि जे ओही एयरलाइनकेँ १०० रुपया देबय पड़त, जाहिसँ टिकट बुक कयल गेल अछि। एकरा लेल इच्छुक यात्री एयरलाइंससँ सम्पर्क कऽ टोकन प्राप्त कऽ सकैत छथि। पहिने मैनुअल तरीकासँ यात्रीकेँ विमानमे चढ़ाओल आ उतारल जाइत छल।
