केंद्र सरकार वित्तीय वर्ष २०२४-२५ लेल महात्मा गांधी राष्ट्रीय ग्रामीण रोजगार गारंटी योजना (मनरेगा) केर अंतर्गत श्रमिकक मजदूरी दरमे ३-१० प्रतिशत बढ़ोत्तरीक घोषणा कयलक अछि। नव दर १ अप्रैलसँ लागू होयत।
एहि वृद्धिक सङ्ग वित्तीय वर्ष २०२४-२५ लेल देशभरिमे मनरेगाक औसत मजदूरी २०२३-२४ मे २६१ रुपैयासँ बढ़ि कऽ २८९ रूपैया भऽ जायत।
मजदूरी दरमे वृद्धि उत्तर प्रदेश आ उत्तराखण्डक लेल तीन प्रतिशतसँ लऽ कऽ गोवाक लेल १०.५६ प्रतिशत आ कर्नाटकक लेल १०.४ प्रतिशत धरि अछि। आन्ध्र प्रदेशमे १०.२९ प्रतिशत, तेलङ्गानामे १०.२९ प्रतिशत आ छत्तीसगढ़मे ९.९५ प्रतिशतक वृद्धि भेल अछि।
लोकसभा चुनावक लेल आदर्श आचार संहिता लागू होयबाक कारणेँ ग्रामीण विकास मंत्रालय निर्वाचन आयोगक अनुमतिक बाद संशोधित मजदूरी दरक घोषणा कयलक।
हरियाणाक मजदूरकेँ देशमे सबसँ बेसी ३७४ रुपैया दैनिक मजदूरी भेटत। अरुणाचल प्रदेश आ नागालैंडक लेल सबसँ कम राशि २३४ रुपैया प्रतिदिन निर्धारित कयल गेल अछि।
केंद्र २०२४-२५ केर केंद्रीय बजटमे मनरेगाक लेल ८६ हजार करोड़ टाका आवंटित कयलक अछि।
