संदेशखलीमे शाहजहाँक गिरफ्तारीक माँग करैत महिला सभ सड़क पर उतरल

कोलकाता
*

यौन उत्पीड़न आ हिंसाक आरोपी तृणमूल कांग्रेसक फरार नेता शेख शाहजहाँ आ हुनक निकट सहयोगीक गिरफ्तारीक माँग करैत शुक्रदिन सन्देशखलीमे तखनि तनाव पसरि गेल, जखन महिला सभ फेरसँ लाठी आ झाड़ू लऽ कऽ सड़क पर उतरि गेलीह।

स्थितिक गम्भीरताकेँ ध्यानमे रखैत पुलिस सन्देशखलीक दूटा ग्राम पंचायतक अन्तर्गत आबयवला क्षेत्रमे धारा १४४ केर अन्तर्गत नव निषेधाज्ञा लागू कयलक अछि, जतय शुक्रदिन भोरसँ तनाव सबसँ बेसी छल।

अतिरिक्त पुलिस निदेशक (दक्षिण बंगाल) सुप्रतिम सरकार भारी पुलिस टुकड़ीक संग तनावपूर्ण प्रभावित क्षेत्रमे पहुँचि गेल छथि। ओ प्रदर्शनकारी महिलासभसँ अपील कयलनि जे ओ सड़क पर विरोध करबाक बदला जिला प्रशासनसँ सम्पर्क कऽ अपन शिकायत दर्ज करथि। अन्य वरिष्ठ पुलिसकर्मी सेहो प्रदर्शनकारी सभकेँ मनयबाक प्रयास कयलनि जे एहि तरहक विरोध प्रदर्शनसँ हुनकर शिकायतक निपटाराक प्रक्रियामे देरी होयत।

५ जनवरीक भोरमे ईडी आ सीएपीएफक जवानपर हमला करबाक मास्टरमाइंड शेख शाहजहाँक छोट भाय शेख सिराजुद्दीन केर स्वामित्ववला मत्स्य फार्मक भीतर स्थानीय लोकसभ द्वारा एकटा गोदाम जरयलाक बाद बृहस्पति साँझसँ सन्देशखलीमे तनाव व्याप्त छल।

शुक्रदिन फरार तृणमूल कांग्रेसक नेताक गिरफ्तारीक अतिरिक्त, प्रदर्शनकारी महिला लोकनि शाहजहाँ आ हुनक सहयोगी द्वारा अवैध आ जबरन कब्जा कयल गेल कृषि भूमि वापिस करबाक माँग सेहो कयलनि, जकरा खारा पानि बहा खराब कऽ देल गेल छल आ ओतय माछक पालन कयल जा रहल छल।

एम्हर लोकसभा सांसद लॉकेट चटर्जी आ विधायक अग्निमित्रा पॉलक नेतृत्वमे भाजपाक एकटा प्रतिनिधिमण्डलकेँ सन्देशखली जयबाक क्रममे पुलिस बीचमे रोकि देलक। भोजेरहाट क्षेत्रमे रोकलाक बाद चटर्जी आ पॉलकेँ पुलिस अधिकारीसभक सङ्ग तीक्ष्ण बहस होइत देखल गेल। भाजपा समर्थक आ पुलिसकर्मीक बीच मामूली झड़प सेहो भेल।
बादमे चटर्जीकेँ गिरफ्तार कऽ मध्य कोलकाताक लालबाजार स्थित कोलकाता पुलिस मुख्यालय लऽ जायल गेल।