भारत निर्वाचन आयोग (ईसीआई) बिहार विधान परिषदक ११ सीटक चुनावक तारीखक घोषणा कऽ देलक अछि। नोटीफिकेशन अर्थात अधिसूचना ४ मार्च केँ जारी होएत। चुनाव २१ मार्चकेँ होएत। मुख्यमंत्री नीतीश कुमार, पूर्व मुख्यमंत्री राबड़ी देवी आ पूर्व मंत्री शाहनवाज हुसैन सहित ११ गोट दिग्गजक कार्यकाल ६ मईकेँ समाप्त भऽ रहल अछि। आब ई देखय पड़त जे भाजपा, जदयू, राजद, कांग्रेस आ हिन्दुस्तानी आवाम मोर्चा विधान परिषदमे केकरा पठबैत अछि। भाजपाक शाहनवाज हुसैन, मंगल पाण्डेय आ संजय पासवानक कार्यकाल सेहो समाप्त भऽ रहल अछि।
शाहनवाज हुसैन आ मंगल पाण्डेयक लोकसभा चुनाव लड़बाक जोरदार चर्चा चलि रहल अछि। संजय पासवानक बेटाकेँ विधान परिषदमे पठयबाक चर्चा अछि। एक दिन पहिने जेडीयूक गोपाल मंडल सेहो शाहनवाज हुसैनक लोकसभा चुनाव पर टिप्पणी कयलनि। ओ इहो दावा कयलनि जे भागलपुर लोकसभा सीट जेडीयूक खातामे जायत।
एहिसँ पहिने जखन बिहारमे राष्ट्रीय जनतांत्रिक गठबंधनक नव सरकारक गठन भेल छल, तखन मानल जाइत छल जे शाहनवाज हुसैन आ मंगल पाण्डेयकेँ निश्चित रूपसँ मंत्री पद देल जायत। लेकिन, एखन धरि, ओ नहिं भेल अछि। ओतहि दुनू वरिष्ठ नेताक क्षेत्रक लोक लोकसभा चुनाव लड़बाक बात कऽ रहल छलाह।
संजय झाकेँ पहिनेसँ राज्यसभामे पठाओल जा चुकल अछि। एमहर जदयूसँ नीतीश कुमारक अलावा संजय कुमार झा, खालिद अनवर आ रामेश्वर महतोकेँ सीट पर सेहो चुनाव होयत। संजय झाकेँ पहिनेसँ राज्यसभामे पठाओल जा चुकल अछि।
राबड़ी देवीक अलावा राजदसँ रामचंद्र पूर्वेक कार्यकाल सेहो समाप्त भऽ रहल अछि। राबड़ी देवीकेँ फेरसँ विधान परिषदमे पठाओल जायत, ई स्पष्ट अछि। कांग्रेसक प्रेम चन्द्र मिश्र आ हम सेक्युलरक संतोष कुमार सुमनक सीट पर सेहो चुनाव होयत। संतोष कुमार सुमन बिहार सरकारमे मंत्री छथि। जीतन राम मांझी हुनके विधान परिषद भेजताह।
विधान परिषद चुनावक शेड्यूल एहि प्रकारसँ अछि :-
नोटीफिकेशन अर्थात अधिसूचनाक तिथि : ४ मार्च
नामांकनक अंतिम तिथि: ११ मार्च
नामांकन पत्रक जांचक तिथि : १२ मार्च
नामांकन वापिस लेबाक अंतिम तिथि : १४ मार्च
चुनावक लेल मतदानक तिथि: २१ मार्च
मतगणनाक तारीख : २१ मार्च सांझमे
