वाल्मीकि नगरमे बनत लव-कुश पार्क : सीएम सम्राट
पटना। समदिया
बापू सभागारमे आयोजित लव-कुश सम्मान समारोहमे मुख्यमंत्री सम्राट चौधरी वाल्मीकिनगरमे 60 करोड़ टाकाक लागतसँ लव-कुश पार्क बनेबाक घोषणा कयलनि। समारोहमे स्वास्थ्य मंत्री निशांत कुमार, राष्ट्रीय लोक मोर्चाक अध्यक्ष उपेंद्र कुशवाहा आ मंत्री श्रवण कुमार सहित कतेको नेता उपस्थित छलाह।
सम्राट चौधरी कहलनि जे लव-कुश समाज 1994 मे सेहो एकजुट छल आ 2026 मे सेहो एकजुट अछि। समाजक उद्देश्य ककरो विरोध नहि, बल्कि न्याय संग आगाँ बढ़ब आ गौरवशाली इतिहासकेँ कायम रखब अछि। ओ बिहारक विकासमे सभ वर्गक भागीदारीकेँ जरूरी बतौलनि।
मुख्यमंत्री लव-कुशक कथाक उल्लेख करैत कहलनि जे माता सीताक सम्मानक लेल लव-कुश भगवान श्रीरामक समक्ष सेहो ठाढ़ भेल छलाह। ओ कहलनि, “हम ओहि परंपराक वंशज छी, जतय मर्यादाक स्थापना लेल भगवान श्रीराम 14 वर्षक वनवास स्वीकार कयलनि।”
निशांतक संबोधनमे युवाक चर्चा
स्वास्थ्य मंत्री निशांत कुमार कहलनि जे लव-कुश सम्मान समारोह बिहारक प्रतिभाकेँ पहिचान आ सम्मान देबाक संग युवाकेँ आगाँ बढ़बाक लेल प्रेरित करबाक प्रयास अछि। शिक्षा, मेहनति आ प्रतिभाक बलपर लव-कुश समाजक लोक विभिन्न क्षेत्रमे अपन पहचान बनौने छथि।
ओ कहलनि जे युवाकेँ उचित अवसर आ प्रोत्साहन देब सभक जिम्मेदारी अछि। निशांत अपन संबोधनमे नीतीश कुमारक समावेशी विकासक सोचक सेहो उल्लेख कयलनि।
समारोहमे उपेंद्र कुशवाहा सहित जेडीयूक कतेको नेता आ मंत्री उपस्थित छलाह। पोस्टरमे नीतीश कुमारक कार्यक्रममे उपस्थितिक उल्लेख छल, मुदा ओ समारोहमे नहि आबि सकलाह।
