नहिं रहलाह मिथिलाक्षरक प्रकाशपुंज कृति नाथ झा

मिथिलाक्षर साक्षरता अभियानकेँ अपूर्णीय क्षति, गहींर धक्का लागल : शास्त्री
दरभंगा समदिया!!! मिथिलाक्षर साक्षरता अभियानक १६१ बैचक अभियानी कृति नाथ झा’क ८२ बरखक अवस्थामे दरभंगामे निधन भऽ गेल। हुनकर निधन पर अभियानक संस्थापक पं. अजय नाथ झा शास्त्री गहींर दु:ख प्रकट करैत कहलनि जे “कृति बाबू मिथिलाक्षरक प्रकाश पुंज छलथि आ हालक किछु बरखसँ सतत ओ मिथिलाक्षरक प्रकाश अभियान, मैपुप्र अखबार, पोथी लिप्यंतरण, शोसल मिडिया आदि भिन्न-भिन्न माध्यमसँ नित प्रति दिन सतत पसारैत रहैथ छलथि। मई २०२१ इस्वीमे मिथिलाक्षर प्रवीण भेलाक बाद दैनिक व्यवहारमे मिथिलाक्षरे केर प्रायः प्रयोग करैत छलथि, हुनकर निधनसँ हमरा, बल्कि सम्पूर्ण मिथिलाक्षर साक्षरता अभियानकेँ गहींर धक्का लागल अछि, हुनका अश्रुपूरित श्रद्धांजलि।”

श्रद्धेय कृति नाथ झा मधुबनी जिलांतर्गत बेनीपट्टी थानाक पाली ग्राम निवासी छलथि आ संप्रति छपकी पड़री, लक्ष्मीसागर, दरभंगामे रहैत छलथि। बहुत स्वाभिमानी, अपन मिथिलाक माटि आ भाषा-लिपि-संस्कृतिक समर्पित व्यक्तित्व छलथि कीर्ति नाथ झा। समस्त मिथिलाक्षर साक्षरता अभियान परिवार हुनक निधिनसं शोकाकुल अछि आ भावभीनी श्रद्धांजलि अर्पित कयलक अछि। चलि गेलथि मिथिलाक्षरक एकटा आर योद्धा।