लालू-राबड़ी आ तेजस्वी सहित 9 पर IRCTC मनी लॉन्ड्रिंग मामिलामे आरोप तय, 7 आरोपित बरी

नई दिल्ली । समदिया

दिल्लीक राउज एवेन्यू कोर्ट आइआरसीटीसी मनी लॉन्ड्रिंग मामिलामे राजद प्रमुख लालू प्रसाद यादव, पूर्व मुख्यमंत्री राबड़ी देवी आ बिहार विधानसभामे विपक्षक नेता तेजस्वी यादव सहित 9 आरोपितक विरुद्ध धन शोधन निवारण अधिनियम (पीएमएलए) केर तहत आरोप तय कऽ देलक। ओतहि अदालत 7 अन्य आरोपितकेँ मामिलासँ डिस्चार्ज कऽ देलक। मामिलाक अगिला सुनवाइ 3 अक्टूबरकेँ होयत।

विशेष न्यायाधीश विशाल गोगने लालू प्रसाद यादव, राबड़ी देवी, तेजस्वी यादव, प्रेम चंद गुप्ता, सरला गुप्ता, विनय कोच्छर, विजय कोच्छर, लारा प्रोजेक्ट एलएलपी आ सुजाता होटल्सक विरुद्ध आरोप तय करबाक आदेश देलनि। गौरव गुप्ता, नाथ मल काकरानिया, राहुल यादव, विजय त्रिपाठी, देवकी नंदन तुलश्यान, राजीव कुमार रेलन आ अभिषेक फाइनेंस प्राइवेट लिमिटेडकेँ अदालत बरी कऽ देलक।

अदालत कहलक जे प्रथम दृष्ट्या लालू यादवक विरुद्ध भेल जांच राजनीतिक रूपसँ प्रभावित नहि बुझाइत अछि। लारा प्रोजेक्ट्सकेँ कथित रूपसँ भेटल लाभ लालू यादवक भूमिकापर संदेह उत्पन्न करैत अछि।

सीबीआईक अनुसार 2004 सँ 2009 धरि रेल मंत्री रहबाक दौरान लालू यादव आइआरसीटीसीक रांची आ पुरी स्थित दूटा होटल संचालनक ठेकामे कथित रूपसँ हेराफेरी भेल टेंडरक माध्यमसँ सुजाता होटल्सकेँ देलनि। आरोप अछि जे एकर बदलामे करोड़ों रुपयाक जमीन बाजार मूल्यसँ काफी कम दाम पर एहेन कंपनीकेँ हस्तांतरित कएल गेल, जाहिक संबंध राबड़ी देवी आ तेजस्वी यादवसँ बताओल गेल अछि।

सीबीआईक एफआईआरक आधार पर ईडी पीएमएलएक तहत मनी लॉन्ड्रिंगक मामिला दर्ज कऽ जांच शुरू कएने छल। यादव परिवार एहि मामिलाकेँ लगातार राजनीतिक साजिश बतबैत रहल अछि आ आरोप लगबैत अछि जे हुनका विरुद्ध ठोस प्रमाण नहि अछि।