हमर सेशेल्स यात्रा कतेको ठोस आ महत्वपूर्ण परिणामसँ भरपूर रहल : प्रधानमंत्री नरेंद्र मोदी

नई दिल्ली । समदिया

भारतक प्रधानमंत्री नरेंद्र मोदी अपन तीन दिनक सेशेल्स केर राजकीय यात्राक समापन करैत काल्हि घर यानी भारत लेल रवाना भ गेलाह। पीएम मोदी एहि यात्राकेँ ठोस आ महत्वपूर्ण परिणामसँ भरल बतेलथि। पीएम मोदी एही सफल यात्रा केर झलक सोशल मीडिया प्लेटफॉर्म एक्स पर साझा कयलनि। एक वीडियो क्लिप पोस्ट करैत ओ लिखलनि कि हमर सेशेल्स केर यात्रा ठोस आ महत्वपूर्ण परिणामसँ भरल छल, जाहिसँ भारत आ सेशेल्स केर बीच दोस्तीकेँ आओर मजबूत कयल जायत। प्रधानमंत्री पिछला 50 सालमे राखल गेल नींवकेँ अगिला 50 सालक समृद्धि लेल महत्वपूर्ण मानलथि। ओ आगू लिखलनि, “हम पूरा भरोसासँ कहि सकैत छि कि पिछला 50 सालसँ हमर संबंध गहरा विश्वास आ साझा प्रगतिक नींव पर बनल अछि। अगिला 50 सालक नवाचार, सतत विकास आ साझा समृद्धिसँ परिभाषित कयल जायत।”

भारतीय प्रधानमंत्री आत्मविश्वाससँ कहलनि, “हमरा ई कहैत खुशी भ रहल अछि कि हमर यात्रासँ सेशेल्स-यूरोपीय संघ (ईयू) संबंधमे सुधार आनयमें सेहो योगदान भेटल अछि, जकर ठोस परिणाम भेटल अछि।

पीएम मोदी मुख्य अतिथिक रूपमे सेशेल्स राष्ट्रीय दिवस समारोहमे शामिल भेलाह।  ओ कहलनि, “हमरा ईहो साझा करैत खुशी भ रहल अछि कि हमरा सेशेल्स राष्ट्रीय दिवस समारोहमे भाग लेबय केर मौका भेटल, खास कय एहन समयमे जखनि देश आजादीक 50 साल मनाबैत अछि।

जनतब देब जे पीएम मोदी सेशेल्स केर स्वतंत्रता दिवस समारोहमे शामिल होय वला पहिल भारतीय प्रधानमंत्री छथि। ई सेशेल्स केर स्वतंत्रता आ भारत आओर सेशेल्सक बीच कूटनीतिक संबंध केर स्थापनाक 50 साल पूरा होय केर मौका सेहो अछि।

उपलब्धि आ परिणामक मामिलामे भारत आ सेशेल्स 19 महत्वपूर्ण समझौता आ घोषणा कयलक। एहिमे प्रत्यर्पण संधि, यूपीआई आधारित डिजिटल भुगतानक शुरूआत आ डिजिटल भुगतान शामिल अछि।

सेशेल्स यात्रा केर आखिरी चरणमे पीएम मोदी पीस पार्कमे महात्मा गांधी केर प्रतिमा पर फूल चढ़ाबै केर संग-संग हुनक स्वागतमे जुटल भारतीय समुदायसँ सेहो बात कयलनि। भारतीय समुदायक सदस्य तिरंगा पकड़ने प्रधानमंत्रीक स्वागत करैत “मोदी-मोदी” आ “भारत माता की जय” केर नारा लगौलनि।