मोदीक अपीलक बाद बिहारमे मंत्री अलग-अलग रंगमे

पटना। समदिया

पीएम मोदी अपील प्रभाव पर पंचायती राज मंत्री दीपक प्रकाश कहलनि जे, प्रधानमंत्रीक अपील केर सफल बनाउ, देशक सामने आबि रहल समस्याक समाधानमे सभ गोटेक योगदान देबाक चाही।

प्रधानमंत्री नरेंद्र मोदी अपीलक असर बिहारक मंत्री पर देखबामे आबि रहल अछि। शुक्रदिन (15 मई, 2026) सम्राट चौधरी पैदल मुख्यमंत्री सचिवालय पहुंचलाह तँ मिथिलेश तिवारी हवा-हवाई केर प्रयोग कयलनि। मंत्री दीपक प्रकाश सेहो पैदले अपन कार्यालय पहुंचलाह।

दीपक प्रकाश कहलनि जे, “प्रधानमंत्रीक अपील केर सफल बनाउ। देशक सामने आबि रहल समस्याक समाधानमे सभ गोटेक योगदान देबाक चाही। हम सभ शुक्रकेँ सप्ताहक दिन निर्धारित कयने छी। कमसँ कम एक दिन हम सभ बिना गाड़ीक जायब। जिनका पास ईवी अछि ओ जेताह गाडीसँ। स्वास्थ्य आ पर्यावरण लेल सेहो ठीक अछि।”

पंचायती राज मंत्री दीपक प्रकाश आगू मीडियासँ कहलथि, “अखन कोनो समस्या अछि, ताहि लेल हम सभ एखन इ शुरू कय रहल छी। मुदा एक बेर आदत भ गेल तँ हम सभ हमेशा लेल इ काज करैत रहब। हम सभसँ अपील करैत छी, सभ गोटे आगू आबि पहल करू।

दोसर दिस बिहारक शिक्षा मंत्री मिथिलेश तिवारी हवा-हवाई (ई-रिक्शा)मे बैसल अपन विभाग पहुंचलाह। शिक्षा मंत्री अपन आधिकारिक आवास छोड़ि शिक्षा विभाग दिस बढ़लाह। हुनक सुरक्षाकर्मी सेहो ई-रिक्शामे सवार छल। हवा-हवाई पर बैसल मिथिलेश तिवारी “भारत माताक जय” केर नारा लगाबैत देखल गेलाह। पीएम मोदीक अपीलक बाद बिहारमे मंत्री फिलहाल अलग-अलग रंगमे देखल जा रहल छथि।