राजदक पोस्टर वार, मतदाता सूची संशोधनक विरोध, चुनाव आयोग आ भाजपाकेँ घेरलक

पटना समदिया
*

किछु मासमे बिहारमे विधानसभा चुनाव होबय वाला अछि। एम्हर विपक्ष मतदाता सूची संशोधन अभियानकेँ लऽ कऽ लगातार सवाल ठाढ़ कय रहल अछि। आब एहि संबंधमे पोस्टर वार सेहो शुरू भऽ गेल अछि। मतदाता सत्यापन अभियानक विरोध पोस्टर लगा कऽ कएल गेल अछि। पोस्टरमे लालू तेजस्वीक तस्वीर अछि। राजद चुनाव आयोग पर हमला कए भाजपाकेँ सुग्गा कहलक अछि।

एहि पोस्टरमे दावा कयल गेल अछि जे आरएसएस केर सर्वेक्षण रिपोर्टक अनुसार तेजस्वीक सरकार बनि रहल अछि, ताहि लेल भाजपा अपन सुग्गा चुनाव आयोगक माध्यमसँ चुनावमे धांधली करा रहल अछि। पोस्टरमे बीएलओ केर तस्वीर देखाओल गेल अछि जे गरीब मतदाताकेँ सबूत देखाबय लेल कहि रहल छथि।

एकर संगहि पोस्टरमे एकटा गामक तस्वीर सेहो देखाओल गेल अछि जतय बाढ़ि आबि रहल अछि। एकटा गरीबक तस्वीर अछि। एक हाथसँ अपन कुटीक रक्षा कऽ रहल छथि आ दोसर हाथसँ कागजात पकड़ने छथि । छाती धरि पानि अछि। लिखल अछि – बाढ़िमे घर डूबि रहल अछि। पहिने अपन घर बचाउ आकि अपन मतदाता कार्डसँ अपन नाम बचाउ ? सर, कृपया बताउ जे हमरा सबकेँ की करबाक चाही ?

विपक्षक आरोप अछि कि चुनाव आयोग भाजपाक इशारा पर काज कऽ रहल अछि।

जनतब जे बिहारमे मतदाता सूची संशोधन अभियान चलि रहल अछि। बीएलओ दर-दर जा रहल अछि। मतदाताकेँ गणना फॉर्म देल जा रहल अछि। मुदा विपक्षक कहब अछि जे चुनाव आयोग भाजपाक इशारा पर काज कऽ रहल अछि। मतदाता सूचीसँ गरीब, पिछड़ल, अत्यंत पिछड़ल, अल्पसंख्यक दलितक नाम हटा देल जाएत। हुनका लोकनिक मतदान अधिकार छीन लेल जायत। गरीब लग ओ कागजात नहि अछि जे मांगल जा रहल अछि।

एहि अभियानक खिलाफ सुप्रीम कोर्टमे याचिका सेहो दायर कएल गेल अछि। जाहि पर सुनवाई चलि रहल अछि। एहि अभियानके ल कय विपक्ष आक्रामक अछि। जखनिकि चुनाव आयोग स्पष्ट कयलक अछि जे ई अभियान मतदाता सूचीक सटीकता आ निष्पक्षता सुनिश्चित करय लेल अछि। कोनो वैध मतदाताक नाम हटाओल नहि जाएत। एहि अभियानक माध्यमसँ घुसपैठिया आओर जिनकर नाम गलत तरीकासँ जोड़ल गेल अछि ओकर नाम मतदाता सूचीसँ हटा देल जाएत।