मोदी-ट्रंपक फोन वार्ता, व्यापार-रक्षा सहित रणनीतिक सहयोग पर चर्चा
निज समदिया, नयी दिल्ली
प्रधानमंत्री नरेंद्र मोदी अमेरिकी राष्ट्रपति डोनाल्ड ट्रंपसँ फोन पर बातचीत कय भारत-अमेरिका संबंधक विभिन्न पहलू पर चर्चा केलनि। दुनू नेता व्यापार, रक्षा, ऊर्जा आ महत्वपूर्ण तकनीकक क्षेत्रमे जारी सहयोगक समीक्षा करैत रणनीतिक साझेदारीकेँ आगाँ बढ़ेबाक जरूरत पर सहमति जतौलनि।
प्रधानमंत्री मोदी कहलनि जे बातचीत उपयोगी रहल आ एहि दौरान द्विपक्षीय संबंधसँ जुड़ल महत्वपूर्ण विषय सभ पर विचार-विमर्श भेल। क्षेत्रीय आ अंतरराष्ट्रीय मुद्दा पर सेहो दुनू नेता अपन-अपन विचार साझा केलनि।
बातचीतमे व्यापारक संग रक्षा, ऊर्जा आ उभरैत महत्वपूर्ण तकनीकक क्षेत्रमे सहयोगकेँ विशेष महत्व देल गेल। दुनू पक्ष लगातार संपर्क बनौने राखि भारत-अमेरिकाक व्यापक वैश्विक रणनीतिक साझेदारीकेँ आगाँ बढ़ेबाक आवश्यकता पर जोर देलक।
दुनू नेताक बातचीतसँ स्पष्ट भेल जे भारत-अमेरिका संबंधमे व्यापारक संग रक्षा, ऊर्जा आ तकनीकी सहयोग सेहो प्रमुख क्षेत्र बनल अछि। क्षेत्रीय आ वैश्विक शांति आ सुरक्षासँ जुड़ल विषय पर सेहो दुनू देशक बीच संवाद जारी रखबाक बात सामने आयल।
