बाढ़ पीड़ित परिवारकेँ दशहरासँ पहिने भेटत ७ हजारक सहायता
पटना । समदिया
मुख्यमंत्री सम्राट चौधरी बुधदिन बाढ़ प्रभावित परिवारकेँ दशहरासँ पहिने प्रति परिवार सात हजार टाका अनुग्रह सहायता देबाक घोषणा कयलनि। ओ अधिकारी सभकेँ बाढ़ि प्रभावित परिवारक पहिचान कऽ समय पर सहायता राशि उपलब्ध करेबाक निर्देश देलनि।
मुख्यमंत्री पश्चिम चम्पारणक बगहा, बैरिया, योगापट्टी आ नौतनक विभिन्न बाढ़ि प्रभावित क्षेत्रक हवाई सर्वेक्षण कऽ स्थिति केर जायजा लेलनि। सारणक मकेर प्रखंड अन्तर्गत हैजलपुर पंचायतमे टूटल तटबन्धक स्थिति सेहो देखलनि।
बैरिया प्रखंडक बथना स्थित राहत शिविरक निरीक्षणक क्रममे मुख्यमंत्री सामुदायिक रसोई, चिकित्सा शिविर, स्वच्छ पेयजल, शौचालय, पशु राहत शिविर आ आवासन व्यवस्थाक जायजा लेलनि। ओ स्वयं प्रभावित लोककेँ भोजन परसलनि आ राहत शिविरमे रहनिहार लोकसँ हुनकर समस्या आ आवश्यकताक जानकारी लेलनि।
मुख्यमंत्री जिला स्तरीय नियन्त्रण कक्षमे बाढ़ि राहत-बचाव कार्यक समीक्षा सेहो कयलनि। बैठकमे नदीक जलस्तर, तटबन्धक स्थिति, प्रभावित आबादी, राहत सामग्रीक वितरण आ एनडीआरएफ-एसडीआरएफक तैनाती पर जानकारी देल गेल।
जल संसाधन विभागक सचिव चन्द्रशेखर सिंह कहलनि जे नेपाल दिसिसँ एहि बेर आबि रहल पानिक मात्रा अत्यधिक रहल। बगहा, रेवा घाट, लालगंज आ गोपालगंजमे उच्चतम जलस्तर दर्ज कयल गेल अछि। गंगाक जलस्तर एखनि खतरा रेखासँ ऊपर अछि, मुदा धीरे-धीरे घटि रहल अछि।
