लगातार दोसर दिन खसल बाजार, सेंसेक्स 243 अंक पिछड़ल

मुंबई । समदिया

महँग कच्चा तेल आ वैश्विक बॉन्ड यील्डमे उतार-चढ़ावक बीच भारतीय शेयर बाजार मंगलकेँ लगातार दोसर दिन गिरावट संग बंद भेल। बीएसई सेंसेक्स 242.65 अंक घटि 72,529.07 पर, जखनिकि निफ्टी 64.05 अंक पिछड़ि 22,716.20 पर बंद भेल।

कारोबारक दौरान सेंसेक्स एक समय 708 अंक आ निफ्टी करीब 211 अंक तक खसल। व्यापक बाजारमे सेहो कमजोरी रहल। निफ्टी मिडकैप 0.99 प्रतिशत आ स्मॉलकैप 0.81 प्रतिशत घटल।

क्षेत्रवार कंज्यूमर ड्यूरेबल्स, केमिकल आ रियल्टी शेयरमे बेसी गिरावट रहल। दोसर दिसि मेटल, फार्मा आ मीडिया क्षेत्रमे मजबूती देखल गेल। निफ्टीमे अदाणी एंटरप्राइजेज आ अदाणी पोर्ट्स प्रमुख रूपसँ बढ़ल, जखनिकि टाइटन, विप्रो, एचसीएल टेक आ टीसीएसमे गिरावट रहल।

विशेषज्ञक अनुसार 22,750-22,800 निफ्टी लेल तत्काल प्रतिरोध आ 22,550-22,600 महत्वपूर्ण सपोर्ट स्तर अछि। बढ़ैत ऊर्जा कीमत आ वैश्विक अनिश्चितताक कारण निवेशक फिलहाल सतर्क रुख अपना रहल छथि।