चुनाव आयोगक खिलाफ इंडिया गठबंधनक प्रदर्शन

नई दिल्ली । समदिया

चुनाव आयोगक खिलाफ इंडियन नेशनल डेवलपमेंटल इन्क्लूसिव अलायंस (इंडिया) गठबंधनक नेता सभ 2 सँ 8 अक्टूबर धरि देशक सभ जिलामे ‘सेव डेमोक्रेसी मार्च’ निकालत, जिलाधिकारीक समक्ष प्रदर्शन करत अपन शिकायत रखत। कांग्रेस अध्यक्ष मल्लिकार्जुन खरगे कहलनि जे 6 अक्टूबरकेँ विपक्षी सांसद सभ ‘मार्च टू इलेक्शन कमीशन’ करत चुनाव आयोगक कार्यालय धरि पहुंचत।

खरगे कहलनि जे गठबंधनक 20 दलक बैठकमे चुनाव प्रक्रिया आ चुनाव आयोग संबंधी मुद्दा पर विस्तारसँ चर्चा भेल। विपक्ष अक्टूबरक दोसर सप्ताहमे राष्ट्रपतिसँ भेंट करबाक समय मांगत आ बादमे बड़का रैली आयोजित करत। दिल्लीमे 1 नवंबरकेँ विपक्षक बड़का रैली प्रस्तावित अछि।

टीएमसी प्रमुख ममता बनर्जी चुनाव आयुक्त ज्ञानेश कुमारक इस्तीफाक मांग केलनि। ओ कहलनि जे मतदानक अधिकार संवैधानिक अधिकार अछि आ लोकतंत्रक रक्षा लेल विपक्ष एकजुट अछि। कांग्रेस नेता राहुल गांधी कहलनि जे बैठकमे लोकतंत्र आ चुनाव प्रक्रियाक मुद्दा पर चर्चा भेल आ विपक्ष एहि विषयकेँ जनताधरि पहुंचाबय लेल एकजुट अछि।