यूपी पुलिस सिपाही भर्ती परीक्षा रद्द, सीएम योगी कहलनि, अराजक तत्वक विरुद्ध होयत कठोरतम कार्रवाई
लखनऊ
*
पेपर लीक भेलाक बाद यूपी पुलिस सिपाही भर्ती परीक्षा रद्द करबाक घोषणा कऽ देल गेल अछि। आब परीक्षा फेरसँ पूर्ण शुद्धताक संग आयोजित होएत। उत्तर प्रदेशक योगी सरकार एकटा पैघ निर्णय लेलक अछि।
पेपर लीकक खबरक बाद हालहिमे आयोजित यूपी पुलिस सिपाही भर्ती परीक्षा रद्द कऽ देल गेल अछि। मुख्यमंत्री योगीक अनुसार परीक्षा छह महीनाक भीतर पूर्ण शुद्धताक संग आयोजित कयल जायत। ओ कहलनि जे युवाक मेहनत आ परीक्षाक पवित्रतासँ खेलनिहारक विरुद्ध कठोर कार्रवाई कयल जायत। परीक्षाक गोपनीयता भंग करयवाला एसटीएफक रडार पर छथि।
मुख्यमंत्री योगी आदित्यनाथ सोशल मीडिया साइट पर कहलनि जे आरक्षी नागरिक पुलिसक पद पर चयन लेल आयोजित परीक्षा-२०२३ केर रद्द करय आ अगिला छह महीनाक भीतर फेरसँ परीक्षा आयोजित करबाक आदेश जारी कयल गेल अछि। मुख्यमंत्री शनिदिन एसटीएफक चलि रहल जाँच आ उक्त परीक्षाक संबंधमे एखन धरि कयल गेल कार्रवाईक समीक्षा करैत ई निर्णय लेलनि।
मुख्यमंत्रीक निर्देश पर गृह विभाग सेहो परीक्षा रद्द करबाक आदेश जारी कयलक अछि। शासन भर्ती बोर्डकेँ निर्देश देलक अछि जे, जे कोनो स्तरपर लापरवाही कयल गेल अछि ओकर विरुद्ध प्राथमिकी दर्ज कऽ अग्रिम कानूनी कार्रवाई सुनिश्चित कयल जाय। सरकार एहि मामलाक जाँच एसटीएफसँ करयबाक निर्णय लेलक अछि, दोषी पाओल गेल व्यक्ति वा संस्थानक विरुद्ध कठोर कार्रवाई करबाक निर्देश सेहो देल गेल अछि।
सरकार छह मासक भीतर पूर्ण शुद्धताक संग फेर सँ परीक्षा आयोजित करबाक आ उत्तर प्रदेश परिवहन निगमक सेवासँ अभ्यर्थी सभकेँ निःशुल्क सुविधा प्रदान करबाक निर्देश देलक अछि।
एहिसँ पहिने उत्तर प्रदेश पुलिस भर्तीक लेल १८ फरवरीकेँ आयोजित परीक्षाक दौरान कृष्णनगरक एकटा स्कूलमे अभ्यर्थी सत्य अमन कुमारक कब्जामे भेटल उत्तर पर्चीसँ पेपर लीक होयबाक आशंका छल।
एफ.आई.आर. दर्ज करयवला निरीक्षक तहरीरमे सेहो लिखने छलाह जे कागज योजनाबद्ध तरीकासँ लीक भेल छल। ओतहि व्हाट्सएप पर प्रश्नक उत्तर भेजनिहार आरोपी नीरजकेँ पुलिस एखन धरि नहिं पकड़लक अछि। आरोपी नीरजकेँ प्रश्नक जानकारी कतऽ भेटल, ई महत्वपूर्ण प्रश्न एखन धरि अनसुलझा अछि।
