पाटलिपुत्र रेलवे स्टेशन तहसनहस, ट्रेनमे देरी पर पथराव, 6 गिरफ्तार

पटना। समदिया

बिहारमे मद्य निषेध विभागक भर्ती परीक्षाक दिन पटनाक पटलीपुत्र रेलवे स्टेशन पर अभ्यर्थी हंगामा मचा देलक। विरोध प्रदर्शनक दौरान अराजकता पसरि गेल। खबरि अछि जे ट्रेन केँ बेर-बेर देरीसँ नाराज हजारों उम्मीदवार स्टेशन परिसरमे विरोध प्रदर्शन करय लागल। स्थिति जल्दीए तनावपूर्ण भ गेल। विरोध प्रदर्शनक दौरान उम्मीदवार पथराव करय लागल आओर उपकरणकेँ तोड़फोड़ करय लागलह। एकर सुचना भेटला पर स्थानीय पुलिस मौका पर पहुंचल। पुलिस जखन स्थिति शांत करबाक प्रयास कयलक तँ आन्दोलित उम्मीदवार पुलिस पर हमला कयलक जाहिमे कतेको पुलिसकर्मी घायल भ गेल।

घटनाक संबंधमे स्थानीय निवासी कहलनि जे निषेध विभागक भर्ती परीक्षा दू पालीमे आयोजित छल। पहिल पालीमे हाजिर होमय लेल भोरसँ हजारों अभ्यर्थी पटलीपुत्र स्टेशन पर जमा भ गेल छल। ट्रेन घंटों देरीसँ परीक्षा छूटि जयबाक डरसँ तामस बढ़ि गेल, जे बादमे हिंसामे बदलि गेल।

जेना-जेना स्थिति बेकाबू होइत गेल, अभ्यर्थी आओर पुलिस आ आरपीएफक बीच सीधा भिड़ंत भ गेल। उग्र भीड़ स्टेशन परिसरक संग-संग परीक्षा स्पेशल ट्रेनमे सेहो खूब तोड़फोड़ कयलक। मामिलाक गंभीरताकेँ देखैत पुलिस आ रेलवे सुरक्षा बलकेँ मोर्चा संभालय पड़ल। स्थितिक गंभीरताकेँ देखैत पुलिस आ रेल संरक्षण बलकेँ हस्तक्षेप करय पड़ल। घटनाक संबंधमे महानिरीक्षक जितेन्द्र राणा कहलनि जे, लगभग दू सँ तीन घंटा धरि हंगामा जारी रहल। पहिल पालीक उम्मीदवारकेँ समय पर परीक्षा केंद्र पहुंचबाक चिंता छल, जाहिसँ हुनक आक्रोश भड़कि गेल। पथराव केर एही घटनामे किछु सुरक्षाकर्मी घायल भ गेल छथि।

पुलिस अधिकारीक अनुसार, पुलिसकेँ हिंसक भीड़केँ नियंत्रित करय आओर तितर-बितर करय लेल आंसू गैसक गोला चलाबय पड़ल। हालात पर नियंत्रण रखबाक लेल हवामे चेतावनी गोली सेहो चलाबय पड़ल। एकर बाद उम्मीदवार सभ पाछू हटल आ धीरे-धीरे स्थिति सामान्य भ गेल। एहि हिंसक झड़पक बाद पटलीपुत्र रेलवे स्टेशन केर आसपासक संवेदनशील इलाकामे भारी संख्यामे अतिरिक्त सुरक्षा बलक तैनाती कयल गेल अछि। पुलिस आ रेल प्रशासन एखन कानून व्यवस्था बहाल करबाक काजमे लागल अछि। प्रशासन घटनाक जांच शुरू कय स्टेशन पर लगाओल गेल सीसीटीवी कैमरा केर मदतिसँ उपद्रवीक पहिचान कय रहल अछि।

घटनाक संबंधमे पटनाक जिलाधिकारी डॉ. त्यागराजन कहलनि जे, आधा राति केर आसपास हमरा सभकेँ सूचना भेटल जे स्टेशन पर किछु लोक हंगामा मचा रहल छथि। हम हुनका बारम्बार समझाबय आ सहयोग करबाक अपील कयलौंह, ताकि परीक्षा देबय जा रहल अभ्यर्थीकेँ कोनो परेशानी नहि होय। मुदा किछु असामाजिक तत्व लगातार इमरजेंसी चेन खींच रहल छल आ विशेष ट्रेन चलाबय जँका विभिन्न मांग कय रहल छल, जखनि कि ओतय पहिनेसँ दू टा स्पेशल ट्रेन उपलब्ध छल। ओ बतौलनि कि किछु लोक परीक्षा देबय जाय वला छात्रकेँ रोकबाक कोशिश कय रहल छल। स्थितिकेँ नियंत्रित करय आ कानून-व्यवस्था बना कय राखय लेल पुलिसकेँ हल्का बल प्रयोग करय पड़ल। डीएम कहलनि कि आब स्थिति पूरा तरहेँ सामान्य अछि। परीक्षामे शामिल होय वला अभ्यर्थीक लेल निर्धारित ट्रेन रवाना भ चुकल अछि आ रेल परिचालन सेहो सामान्य रूपसँ  जारी अछि।

जनतब दी जे उक्त मामिलामे काल्हि रेल जिला पटना एकटा प्रेस विज्ञप्ति जारी कय कहलक जे 13 जून केर मध्य 12 बजे पाटिलपुत्र स्टेशन पर अभ्यर्थीक भीड़ बढ़य लागल आ तकर बाद हंगामा शुरू भ गेल। एही पत्थरबाजी एवं उपद्रवमे 06 लोककेँ गिरफ्तार कयल गेल अछि आ एफआईआर दर्ज कय अन्य केर पहिचान लेल कार्यवाही कयल जा रहल अछि।