सरकारी डॉक्टर पेशेंटकेँ अपन क्लिनिक आबय लेल कहलनि, कार्यवाही होयत : स्वास्थ्य मंत्री
पटना। समदिया
बिहारक स्वास्थ्य मंत्री निशांत कुमार एक्शन मोडमे छथि। पटना मेडिकल कॉलेज अस्पतालक दौराक बाद ओतय केर प्रिंसिपलक खिलाफ कार्यवाही कयलनि आओर किछि आओर डॉक्टरक खिलाफ सेहो कार्यवाही केलनि। आब राजवंशी नगरक आर्थोपेडिक अस्पतालक दौराक बाद ओतय अनुपस्थित डॉक्टरक खिलाफ कार्यवाहीक बात कय रहल छथि।
निशांत कुमार कहलनि जे, मरीजकेँ अपन निजी अस्पतालमे इलाज करय लेल कहय वला डॉक्टर पर सेहो कार्यवाही कएल जाएत। ओ बतौलनि जे लापरवाही आ अनुशासनहीनता बर्दाश्त नहि होयत। स्वास्थ्य मंत्री कहलनि जे, जे डॉक्टर अनुपस्थित छलाह, हुनका कारण बताबय पड़त।
पटना मेडिकल कॉलेज अस्पतालमे कनिष्ठ डॉक्टरक मुद्दाक संबंधमे स्वास्थ्य मंत्री निशांत कुमार कहला जे अधीक्षककेँ बजाउल गेल अछि आ कोनो तरहक मुद्दाकेँ हुनकासँ गप कय ओकर समाधान कयल जाएत। जूनियर डॉक्टर मारपीटक घटनाक बाद सुरक्षा सहित कतेको मांगकेँ ल कय काज ठप्प कय देने छथि।
स्वास्थ्य विभाग सचिव पीएमसीएच केर एकटा जूनियर डॉक्टरसँ बात कयलनि। स्वास्थ्य मंत्रीक आह्वान पर पीएमसीएच अधीक्षक सचिवालय पहुंचि निशांत कुमारसँ भेंट कयलनि। पीएमसीएचमे सामान्य स्वास्थ्य सेवा बहाल करबाक उच्च स्तरीय प्रयास शुरू भ गेल अछि।
स्वास्थ्य मंत्री कहलनि, “काल्हि हम एलएनजेपी अस्पताल गेल रही, मुदा डाक्टर नहि आयल छल। जखन हम फोन केलहुँ तँ ओ सभ स्पष्टीकरण देलनि। हुनका सभकेँ कारण बताओ नोटिस जारी कय देल गेल अछि। एकटा डाक्टर एकटा मरीजकेँ अपन निजी क्लिनिकमे आबय लेल कहलनि, हुनका पर सेहो कार्यवाही कयल जायत।”
जनतब दी जे हालमे (23 जून) जखन स्वास्थ्य मंत्री पीएमसीएच केर दौरा कयलनि तँ तत्कालीन प्राचार्य नरेंद्र प्रताप सिंह गायब छलाह। एकर बाद हुनका अपन पदसँ हटा देल गेल। गीता सिन्हाकेँ जिम्मेदारी देल गेल। हालाँकि नरेंद्र प्रताप सिंह कहलनि जे हम बहुत बिम्मर छलौंह ताहै लेल नहि अयलौंह, बिना बात कयने एकतरफा कार्यवाही अछि।
