युवासभसँ स्वास्थ्य मंत्री निशांत कुमारक अपील, ‘सिगरेट, गुटखा आ शराब छोड़ि स्वस्थ जीवन अपनाउ’

पटना । समदिया

बिहारक स्वास्थ्य मंत्री निशांत कुमार राज्यक युवासभसँ सिगरेट, गुटखा आ शराबक सेवन छोड़ि स्वस्थ जीवन अपनाबयक अपील केलनि अछि। ओ कहलनि जे युवा नशासँ दूर रहथि आ अपन अनमोल जीवनकेँ स्वस्थ आ बेहतर बनेबाक दिसि ध्यान देथि।

बुधदिन पटनामे स्वास्थ्य विभागक तरफसँ आयोजित ‘जाँच एवं उपचार- चिकित्सा अहाँक द्वार’ राज्यव्यापी अभियानक शुभारंभ भेल। एहि अवसर पर मुख्यमंत्री सम्राट चौधरी आ स्वास्थ्य मंत्री निशांत कुमार 38 जिलाक लेल जागरूकता रथकेँ हरियर झंडी देखाय रवाना केलनि। ई अभियान 30 नवंबर धरि चलत।

अभियानक तहत 30 वर्षसँ बेसी आयुक नागरिकक घर-घर जा कऽ स्वास्थ्य जाँच कएल जाएत आ हुनकर हेल्थ रिकॉर्ड तैयार कएल जाएत। एहि दौरान मधुमेह, उच्च रक्तचाप, कैंसर, हृदय रोग, सांस आ फेफड़ासँ जुड़ल बीमारी तथा फैटी लिवर जेकाँ गैर-संचारी रोगक समय पर पहिचान कऽ आवश्यक उपचार सुनिश्चित कएल जाएत।

स्वास्थ्य मंत्री निशांत कुमार आईएएनएससँ बातचीतमे कहलनि जे राज्यमे गैर-संचारी रोग (एनसीडी)क जाँच लेल राज्यव्यापी अभियान शुरू कएल गेल अछि। एहि अभियानक माध्यमसँ 30 वर्षसँ अधिक आयुक लोकक जाँच आ उपचार कएल जाएत। सरकारक लक्ष्य करीब 6 करोड़ लोकक स्क्रीनिंग करबाक अछि।

ओ कहलनि जे जाँचक क्रममे डायबिटीज, हाइपरटेंशन, थायरॉयड, कैंसर अथवा लिवर-किडनीसँ संबंधित बीमारीक लक्षण भेटलापर आवश्यक जाँच कएल जाएत। बीमारीक लक्षण चिन्हित होमयवला मरीजकेँ उचित उपचारक संग चिकित्सकीय परामर्श आ निःशुल्क दवा सेहो उपलब्ध कराओल जाएत।

मंत्री कहलनि जे अभियान लेल सभ आवश्यक तैयारी पूरा कऽ लेल गेल अछि आ आधुनिक उपकरण सेहो खरीदल गेल अछि। ई अभियान राज्यक 14,500 स्वास्थ्य केंद्र पर संचालित कएल जा रहल अछि। ओ राज्यक लोकसँ बेसीसँ बेसी संख्यामे अभियानसँ जुड़बाक अपील केलनि।

युवासभसँ विशेष अपील करैत स्वास्थ्य मंत्री कहलनि जे ओ सभ अभियानमे सहभागी बनथि आ सिगरेट, गुटखा आ शराबक सेवन नहि करथि। ओ कहलनि जे युवाकेँ अपन कीमती जीवनक महत्व बुझबाक चाही आ नशासँ दूर रहि स्वस्थ आ बेहतर भविष्यक दिसि आगाँ बढ़बाक चाही।