आ आब बांकामे, घटनापर तेजस्वीक हमला, चिराग कहलनि – डूबि मरबाक बात
पटना । समदिया
बिहारमे नाबालिग छात्रा सभक संग दुर्व्यवहारक घटना लगातार सामने अयलाक बाद राजनीतिक बयानबाजी तेज भऽ गेल अछि। जमुई आ समस्तीपुरक बाद आब बांका स्थित ऐतिहासिक मंदार पर्वतपर नाबालिग लड़कीक संग छेड़खानीक वीडियो वायरल भेल अछि। एहि घटनापर विपक्षी नेता तेजस्वी यादव सरकारपर सवाल उठौलनि, तऽ केंद्रीय मंत्री चिराग पासवान अधिकारी सभपर कार्रवाईक मांग कएलनि।
तेजस्वी यादव एक्सपर पोस्ट करैत कहलनि जे बिहारमे कानून-व्यवस्थाक स्थिति चिंताजनक अछि। ओ सवाल उठौलनि जे जमुई कांडमे बाँकी आरोपित सभक की भेल आ समस्तीपुरक आरोपित सभकेँ की सजा भेटल। बांका घटनाक आरोपित सभकेँ शीघ्र गिरफ्तार करबाक मांग करैत ओ मुख्यमंत्री सम्राट चौधरीपर जातीय समीकरणक आधारपर कार्रवाई करबाक आरोप लगौलनि। तेजस्वी लिखलनि जे अपराधी सभक सामाजिक पृष्ठभूमि देखिकऽ न्याय आ सजा तय नहि हेबाक चाही।
चिराग कहलनि – अधिकारी सभपर सेहो कार्रवाई होए
केंद्रीय मंत्री चिराग पासवान कहलनि जे केवल गिरफ्तारी अथवा मुठभेड़सँ एहेन घटना नहि रुकत। जाहि अधिकारी सभक नजरिक सोझाँ एहेन घटना होइत अछि, हुनका विरुद्ध सेहो कार्रवाई जरूरी अछि। ओ कहलनि जे बिहारमे एहेन लगातार घटना होएब सरकार लेल डूबि मरबाक बात अछि।
चिराग कहलनि जे जमुई आ समस्तीपुरक घटना पर त्वरित कार्रवाई भेल अछि, मुदा भविष्यमे एहेन घटना रोकबाक लेल प्रशासनिक स्तरपर सेहो जवाबदेही तय करबाक आवश्यकता अछि। ओ कहलनि जे सरकारकेँ एहेन मामिलामे ‘जीरो टॉलरेंस’क नीति अपनाबय पड़त आ बच्चा सभमे सुरक्षा केर भरोसा कायम करब सभक जिम्मेवारी अछि।
जमुई, समस्तीपुरक बाद बांका घटनासँ बढ़ल चिंता
हालमे जमुईक मड़वा पहाड़ीपर छात्रासँ दुर्व्यवहारक वीडियो वायरल भेल छल। मामिलामे मुख्य आरोपित नंदन यादवकेँ पुलिस मुठभेड़मे पैरमे गोली लागलाक बाद गिरफ्तार कएलक। तकर बाद समस्तीपुरक कर्पूरीग्राम क्षेत्रमे सेहो नाबालिग लड़कीसँ छेड़खानीक मामिला सामने आयल, जाहिमे पुलिस चारि आरोपितकेँ गिरफ्तार कऽ जेल पठौलक।
आब बांका स्थित मंदार पर्वतसँ सामने आयल वीडियोमे किछु युवक नाबालिग लड़कीकेँ घेरि कऽ डरबैत-धमकबैत देखल जा रहल छथि। घटनाक बाद पुलिसक कार्रवाईपर नजरि अछि।
