एशियन गेम्स 2026: गुलवीर सिंहकेँ रजत, मनप्रीत कौरकेँ कांस्य

एथलेटिक्समे भारतकेँ दू पदक, टेबल टेनिसमे सेहो कांस्य पक्का; नेपाल अफगानिस्तानकेँ हरौलक

नई दिल्ली । समदिया

एशियन गेम्स 2026 मे भारतक लेल एथलेटिक्समे शानदार दिन रहल। पुरुष 10,000 मीटर दौड़मे भारतीय एथलीट गुलवीर सिंह 28:29.38 मिनटक समयक संग रजत पदक जीतलनि। कठिन अंतिम दौरमे धैर्य कायम राखैत ओ दोसर स्थान हासिल कएलनि।

महिला शॉट पुटमे मनप्रीत कौर 17.17 मीटरक सर्वश्रेष्ठ थ्रो कऽ कांस्य पदक अपन नाम कएलनि। भारतक दोसर एथलीट कृष्णा जयशंकर मेनन 16.57 मीटरक प्रयासक संग पाँचम स्थान पर।

महिला पोल वॉल्ट फाइनलमे बरानिका इलांगोवन 4.15 मीटर पार कऽ तेसर स्थान पर पदकक दौड़मे बनल छथि। दोसर भारतीय सिंधूश्री गणेशा कोनो सफल प्रयास नहि कऽ सकलीह।

टेबल टेनिसक मिश्रित युगलमे मानुष शाह आ दिया चिताले सेमीफाइनलमे चीनक वांग चुकिन आ सुन यिंगशा सँ 11-8, 11-5, 11-8, 11-2 सँ हारलनि। सेमीफाइनलमे पहुँचबाक कारण भारतक जोड़ीकेँ कांस्य पदक पक्का भेल।

महिला हेप्टाथलानमे पूजा आ अनामिका पदकसँ वंचित रहलथि। पूजा छठम आ अनामिका सातम स्थान पर रहलथि। भारोत्तोलनमे निरुपमा सेरम देवी 217 किलो कुल भार उठाकऽ सातम स्थान पर रहलीह।

पुरुष 100 मीटरमे गुरिंदरवीर सिंह आ अनिमेश कुजुर फाइनलमे जगह नहि बना सकलथि। गुरिंदरवीर 10.32 सेकेंडक समयक संग 11म आ अनिमेश 10.38 सेकेंडक संग 18म स्थान पर रहलथि।

क्रिकेटमे सेहो नेपाल पैघ उलटफेर करैत अफगानिस्तानकेँ पाँच विकेटसँ हरा देलक। अफगानिस्तान 102 रन बनौलक, जकर जवाबमे नेपाल 17.2 ओवरमे लक्ष्य हासिल कऽ लेलक।