बिहारमे 20 जिलामे आंधी-बारिशक येलो अलर्ट, 40 किमी प्रतिघंटा धरि चलत हवा
पटना ।समदिया
बिहारमे पछिला किछु दिनसँ मौसममे बदलाव देखल जा रहल अछि। राजधानी पटना सहित मुजफ्फरपुर, सीतामढ़ी आ अन्य जिलामे 23 सितंबरक देर रातिसँ आंधी-बारिशक दौर जारी अछि। एहि बीच पटना मौसम विज्ञान केंद्र 26 सितंबर लेल 20 जिलामे आंधी, वज्रपात आ वर्षाक येलो अलर्ट जारी कएने अछि।
मौसम विभागक अनुसार 26 सितंबरकेँ पश्चिमी चंपारण, पूर्वी चंपारण, गोपालगंज, सीवान, सारण, बक्सर, भोजपुर, पटना, बेगूसराय, लखीसराय, शेखपुरा, नालंदा, जहानाबाद, अरवल, कैमूर, रोहतास, औरंगाबाद, गया आ नवादा जिलामे 30 सँ 40 किलोमीटर प्रतिघंटा धरि गतिसँ हवा चलि सकैत अछि। एहि दौरान कतहु-कतहु वर्षा आ वज्रपातक संभावना अछि।
27 सितंबरसँ मौसममे सुधारक संभावना
मौसम विज्ञान केंद्रक पूर्वानुमान अनुसार 27 सितंबरसँ 1 अक्टूबर धरि बिहारमे मौसम सामान्य रहबाक संभावना अछि। एहि अवधि लेल कोनो जिलामे विशेष अलर्ट जारी नहि कएल गेल अछि।
पटनामे 25.7 डिग्री अधिकतम तापमान
पछिला 24 घंटामे पटनामे अधिकतम तापमान 25.7 डिग्री आ न्यूनतम 23.6 डिग्री सेल्सियस दर्ज कएल गेल। पूरा बिहारमे सभसँ कम तापमान वाल्मीकिनगर (पूर्वी चंपारण) मे 21 डिग्री सेल्सियस रहल। नालंदामे तापमान 24.4 डिग्री सेल्सियस दर्ज भेल, जे राज्यक एकमात्र जिला रहल जतए तापमानमे बढ़ोतरी दर्ज कएल गेल।
