सम्राट चौधरी मधुबनीक राजनगरमे, कामाख्या मंदिरमे कयलनि पूजा-अर्चना, SSB कैंपमे इंडो-नेपाल सीमा सुरक्षापर चर्चा
मधुबनी । समदिया
बिहारक मुख्यमंत्री सम्राट चौधरी रविकेँ मधुबनी पहुँचलाह। ओ राज पैलेस स्थित कामाख्या मंदिरमे मिथिला परंपराक अनुसार विधि-विधानपूर्वक पूजा-अर्चना कयलनि। मुख्यमंत्री मंदिरमे आरती सेहो कयलनि आ राज्यमे अमन-शांति तथा तीव्र विकासक कामना कयलनि।
पूजा-अर्चना कयला उपरांत मंदिरसँ बाहर निकलैत काल राष्ट्रीय संगीत नाटक अकादमीक राष्ट्रपति पुरस्कारसँ सम्मानित महेंद्र राम मुख्यमंत्री सम्राट चौधरीकेँ सम्मानित कयलनि।
तकर बाद मुख्यमंत्री एसएसबी कैंप पहुँचलाह, जतय इंडो-नेपाल सीमाक सुरक्षा व्यवस्थाकेँ लऽ कऽ अधिकारीसभक संग बैठक कयलनि। बैठकमे सीमा सुरक्षासँ संबंधित विभिन्न मुद्दापर विस्तारसँ विचार-विमर्श कयल गेल।
बैठक समाप्त भेलाक बाद मुख्यमंत्री सम्राट चौधरी हेलिपैड पहुँचलाह। ओतयसँ ओ एकटा निजी कार्यक्रममे शामिल हेबाक लेल राजनगर प्रखंडक पिलखवार गाम लेल रवाना भेलाह। मुख्यमंत्री पिलखवार गाममे आयोजित श्राद्ध कर्ममे शामिल होयताह।
