प्रधानमंत्री नरेन्द्र मोदी शनिकेँ स्वामी योजनाक अन्तर्गत वीडियो कॉन्फ्रेंसिंगक माध्यमसँ ६५ लाख स्वामित्व सम्पत्ति कार्ड वितरित कयलनि। एहि कार्यक्रममे १२ राज्य आ केन्द्र शासित प्रदेशक ५०,००० सँ बेसी गाम शामिल अछि। प्रधानमंत्री मोदी कहलनि जे पछिला पाँच सालमे लगभग डेढ़ करोड़ लोककेँ सम्पत्ति कार्ड देल गेल अछि। प्रधानमंत्री कहलनि जे ई दिन ग्रामीण भारत आ ओकर अर्थव्यवस्थाक लेल महत्वपूर्ण अछि। अप्रैल २०२० मे शुरू भेल स्वामित्व योजनाक मुख्य उद्देश्य गाममे रहयवला लोकक सम्पत्तिकेँ कानूनी अधिकार देनाइ अछि।
प्रधानमंत्री मोदी बतौलनि जे सम्पत्ति कार्डक माध्यमसँ लोकसभकेँ अपन जमीन आ घरक कानूनी प्रमाण भेटैत अछि। एहिसँ नहिं मात्र ग्रामीण क्षेत्रमे विकासकेँ बढ़ावा भेटैत छैक बल्कि सम्पत्तिक अधिकार प्रदान कऽ गरीबी कम करबामे सेहो सहायता भेटैत छैक। ओ इहो उल्लेख कयलनि जे दुनिया भरिमे सम्पत्ति अधिकारक कमी एकटा पैघ मुद्दा अछि, आ एकरा दूर करब आर्थिक विकासक लेल महत्वपूर्ण अछि।
प्रधानमंत्री जलवायु परिवर्तन, पानिक कमी, आ स्वास्थ्य संकट सन वैश्विक चुनौतिसभक सेहो उल्लेख कयलनि। ओ कहलनि जे एहि मुद्दासभक समाधान आ गरीबी कम करबामे सम्पत्तिक अधिकार महत्वपूर्ण भूमिका निभाबैत अछि। स्वामित्व योजनाक अन्तर्गत आधुनिक तकनीकक उपयोग करैत गामक जमीनक सर्वेक्षण आ मानचित्रण कयल जाइत अछि, जाहिसँ लोकसभकेँ हुनक सम्पत्तिक कानूनी प्रमाण भेटैत अछि। ई योजना ग्रामीण भारतमे पारदर्शिता आ सशक्तिकरणकेँ बढ़ावा दऽ रहल अछि।