केंद्र सरकार 2029 धरि भारतकेँ नशामुक्त बनेबाक रखलक लक्ष्य : अमित शाह
गोवा । समदिया
केंद्रीय गृह मंत्री अमित शाह रविकेँ कहलनि जे केंद्र सरकार वर्ष 2029 धरि भारतकेँ नशामुक्त बनेबाक लक्ष्यसँ आगामी तीन वर्षक रोडमैप तैयार कएने अछि। एहि अभियानक चारि प्रमुख स्तंभमे इंटेलिजेंस आधारित प्रवर्तन, प्रीकर्सर आ सिंथेटिक ड्रग्स पर नियंत्रण, डिमांड-हार्म रिडक्शन तथा क्षमता निर्माण आ समन्वय शामिल अछि।
शाह कहलनि जे 2019 सँ देशक आंतरिक सुरक्षामे उल्लेखनीय सुधार भेल अछि। जम्मू-कश्मीरमे अनुच्छेद 370 हटलाक बाद अलगाववादमे कमी आएल अछि, नक्सलवाद समाप्तिक दिसि अछि आ पूर्वोत्तरमे करीब 10 हजार युवासभ हथियार छोड़ि मुख्यधारामे लौटल छथि। विभिन्न संगठनक संग 14 सँ बेसी समझौता सेहो भेल अछि।
ओ कहलनि जे 2019 सँ जुलाई 2026 धरि 36 देशसँ 274 भगोड़ा अपराधी भारत आनल गेल अछि। एहि दौरान भगोड़ा अपराधीसँ जुड़ल करीब 17,874 करोड़ टाकाक संपत्ति सील कएल गेल। ‘भारतपोल’क माध्यम सँ 14 सँ बेसी एजेंसीकेँ जोड़ल गेल अछि।
नशामुक्तिक अभियानक तहत ‘मानस हेल्पलाइन’ 1933, ‘निदान पोर्टल’ आ डेटा आधारित ड्रग्स हॉटस्पॉटक नक्शा तैयार कएल गेल अछि। सरकार छोटसँ छोट खेपक स्रोतसँ लऽ कऽ पूरा ड्रग्स नेटवर्क धरि पहुँचबाक रणनीति पर काज कऽ रहल अछि।
शाहक अनुसार, 2004-14क दौरान 3.36 लाख किलोग्राम ड्रग्स नष्ट भेल छल, जखनकि 2014-26मे 48.68 लाख किलोग्राम ड्रग्स नष्ट कएल गेल। एहि अवधिमे ड्रग्सक जब्ती सेहो 26 लाखसँ बढ़ि कऽ 1.19 करोड़ किलोग्राम भऽ गेल।
