भारतीय मांसाहारी भोजन स्वादिष्ट : राहुल गांधी
निज समदिया । नई दिल्ली
ब्रिक्स शिखर सम्मेलनक रात्रिभोजमे पूर्णतः शाकाहारी भोजन परोसला गेलाक बाद कांग्रेस नेता आ लोकसभाक नेता प्रतिपक्ष राहुल गांधी भारतीय लोकक खान-पानक पसंद पर टिप्पणी केलनि। ओ कहलनि जे भारतमे करीब 80 प्रतिशत लोक मांसाहारी छथि आ भारतीय मांसाहारी व्यंजन स्वादिष्ट होइत अछि।
रविकेँ सोशल मीडिया पर पोस्ट करैत राहुल गांधी लिखलनि, “रिकॉर्ड लेल : 80 प्रतिशत भारतीय मांसाहारी छथि। भारतीय मांसाहारी खाना स्वादिष्ट होइत अछि। हमर बहिनक छोला-भटूरा सेहो।” एहि संग ओ छोला-भटूराक तस्वीर सेहो साझा केलनि।
ब्रिक्स डिनरमे परसल गेल छल शाकाहारी व्यंजन
प्रधानमंत्री नरेंद्र मोदी शनिदिन भारत मंडपममे ब्रिक्स शिखर सम्मेलनमे सहभागी नेता आ प्रतिनिधिक लेल रात्रिभोजक आयोजन केने छलाह। एहि भोजमे पूर्णतः शाकाहारी मेन्यू राखल गेल छल।
प्रारंभिक व्यंजनमे ‘खांडवी मिले’ आ ‘खुंब गलौटी’ शामिल छल। मुख्य भोजनमे ‘पनीर लबाबदार’, ‘गुच्छी मार्मिक’, ‘कैरेट बीन पोरियाल’, ‘थक्काली बेले सारू’, मिलेट पुलाव, चुकंदरक रायता आ विभिन्न प्रकारक भारतीय रोटी परसल गेल।
मिठाईमे ‘ओल्ड दिल्ली फ्रूट क्रीम विद जलेबी’ आ ‘शाहतूत फिरनी’ शामिल छल। रात्रिभोजक दौरान भारत सहित ब्रिक्स सदस्य देशक कलाकार सभक सांस्कृतिक प्रस्तुति सेहो भेल।
