भाजपा वाशिंग मशीन अछि, मोदी ओ वाशिंग पाउडर जे हर दाग कऽ दैछ साफ : कांग्रेस

नई दिल्ली
*

कांग्रेस नेता पवन खेड़ा मोदी सरकार पर हमला करैत कहलनि, “हमर कपड़ा पर दाग लागैत अछि तखन कतेको बेर महंगसँ महंग वाशिंग पाउडर सेहो ओ दाग नहिं हटा पाबैत अछि। मुदा आब बाजारमे एकटा वाशिंग पाउडर आ वाशिंग मशीन आबि गेल अछि, जे हर दागकेँ साफ करैत अछि। वाशिंग पाउडरक नाम अछि ‘मोदी वाशिंग पाउडर’ आ एहि वाशिंग मशीनक दाम ८,५५२ करोड़ टाका अछि।”

ई मशीन नहिं केवल साफ करैत अछि, बल्कि स्पिन बटन दबेलासँ घोटाला करय वाला देशभक्त भऽ जाइत छैक आ स्लो बटन दबाबैसँ जाँच धीमा भऽ जाइत छैक। ई एहि मशीनक जादू अछि, तेँ एकरा ‘जादुई मशीन’ कहल जाइत अछि।

ओ कहलनि “सीबीआई प्रफुल्ल पटेलक खिलाफ मामिला बंद कए देलक। ओ किछु मास पहिने भाजपा गठबंधनमे शामिल भऽ गेलाह। प्रफुल्ल पटेल वाशिंग मशीन लग गेलाह आ साफ-सुथरा बाहर आबि गेलाह। ई मात्र एकटा नाम नहिं अछि, अपितु एहन २१ टा नाम अछि। भाजपा प्रफुल्ल पटेलपर आरोप लगओलक जे एयर इंडियाकेँ लीज पर लेबाक कोनो आवश्यकता नहिं छल। मुदा तइयो विमान लेल गेल, जाहिसँ ३००० करोड़ टाकासँ बेसीक नोकसान भेल। आरोप छल जे हमरा पाइ भेटल। तत्कालीन सीएजी विनोद रॉय अप्रिय टिप्पणी कयलनि, मुदा जँ आरोप झूठ छल तखन नरेन्द्र मोदीकेँ एहि देशसँ माफी मांगबाक चाही।”

आइ देशक लोकतंत्र, राजनीति आ पत्रकारिताक मजाक उड़ायल जा रहल अछि। आब एहि मजाक केर समाप्त करब आवश्यक अछि, किएक तँ आब ई मजाक क्रूर भऽ गेल अछि। हम अहांकेँ एहन वाशिंग मशीन नहिं बेचि सकब आ ने अहाँ ओकरा खरीद सकब।
किएक तँ मात्र एकटा व्यक्ति लग ८,५५२ करोड़ टाकाक मशीन भऽ सकैत अछि, ओकर नाम नरेन्द्र मोदी अछि। आइ देशकेँ जानबाक अधिकार अछि – देशमे एहेन वाशिंग पाउडर आ वाशिंग मशीन आयल अछि, जे घोटालाबाज सभकेँ राष्ट्रभक्त बना दैत अछि।