‘एकटा खून माफ होइत तऽ ज्ञानेश कुमारकेँ मारि दैतौंह गोली ’: मुकेश सहनीक विवादित बयान

पटना । समदिया

विकासशील इंसान पार्टी (VIP) केर प्रमुख मुकेश सहनी मुख्य चुनाव आयुक्त (CEC) ज्ञानेश कुमारकेँ लऽ कऽ विवादित बयान देलनि अछि। पटनामे पत्रकार सभसँ बातचीतक दौरान सहनी कहलनि जे, “जँ हमरा एकटा खून माफ होइत तऽ सभसँ पहिने ज्ञानेश कुमारकेँ गोली मारि दैतौंह।” हालांकि, ओ कहलनि जे ओ संविधान माननिहार व्यक्ति छथि, तेँ एहन काज नहि करताह। हुनकर ई बयान मतदाता सूचीक विशेष गहन पुनरीक्षण (SIR) केँ लऽ कऽ विपक्ष आ चुनाव आयोगक बीच चलि रहल विवादक बीच आयल अछि।

‘चुनाव आयोग बीजेपीक आयोग बनि गेल’

मुकेश सहनी चुनाव आयोग पर गंभीर आरोप लगौलनि। हुनकर कहब छल जे चुनाव आयोग बीजेपीक आयोग बनि गेल अछि आ ज्ञानेश कुमार संविधानक संग खिलवाड़ कऽ रहल छथि। सहनी कहलनि जे चुनाव कोनो नेता लेल नहि, बल्कि जनता लेल होइत अछि।

2029 मे सरकार बदलबाक दावा

सहनी 2029क लोकसभा चुनावक चर्चा करैत दावा कएलनि जे राहुल गांधीक नेतृत्वमे 2029 मे सरकार बनत। ओ कहलनि जे ज्ञानेश कुमार जेल जाएबला पहिल व्यक्ति होयताह आ एहि मामिलामे संग देनिहार अन्य लोक सेहो जेल जा सकैत छथि। प्रधानमंत्री नरेंद्र मोदीक संदर्भमे सेहो सहनी जेल जएबाक बात कहलनि।

चुनाव प्रक्रिया पर सेहो सवाल उठबैत सहनी कहलनि जे जँ चुनावमे जनादेशकेँ गलत ढंगसँ कोनो पक्षमे प्रभावित कएल जा सकैत अछि तऽ चुनाव आयोगक जरूरत की अछि। ओ चुनाव पर होइत सरकारी खर्चक उल्लेख करैत चुनाव बंद करबाक बात सेहो कहलनि।

SIR केँ लऽ कऽ विवाद

सहनीक बयान मतदाता सूचीक विशेष गहन पुनरीक्षण (SIR) केँ लऽ कऽ चलि रहल राजनीतिक विवादक बीच आयल अछि। विपक्षी दल एहि प्रक्रियाकेँ रोकबाक मांग करैत चुनाव आयोगक भूमिकापर सवाल उठा रहल अछि।

चुनाव आयोगक अनुसार SIR सँ जुड़ल निर्णय तीनू चुनाव आयुक्तक सहमतिसँ लेल गेल अछि। आयोग ईहो स्पष्ट कएलक अछि जे चर्चाक दौरान कोनो आयुक्तक व्यक्तिगत रायकेँ आयोगक अलग निर्णय नहि मानल जा सकैत अछि।

रिपोर्ट सभमे दावा कएल गेल अछि जे चुनाव आयुक्त सुखबीर सिंह संधू आ विवेक जोशी पछिला 10 मासमे SIR सँ जुड़ल किछु निर्णय आ प्रक्रियापर आपत्ति जतेने छलाह। एहिमे मतदाता सूचीमे नाम जोड़ब, हटाएब आ पुनः बहाल करबक संग फॉर्म-6 आ वोटर डेटा रखरखावसँ जुड़ल मामिला शामिल बताओल गेल अछि।