सांसद पप्पू यादव समेत समर्थक पर मारिपीटक एफआइआर, चेन छीनबाक आरोप
पटना । समदिया
गर्दनीबाग धरना स्थल लग सरकारी कर्मीसँ मारिपीट आ सोनाक चेन छीनबाक आरोपमे सांसद राजेश रंजन उर्फ पप्पू यादव समेत हुनकर समर्थकक विरुद्ध एफआइआर दर्ज भेल अछि। पुरान सचिवालयमे पदस्थापित सरकारी कर्मी अरविंद कुमारक लिखित आवेदन पर गर्दनीबाग थानामे कांड संख्या 849/26 दर्ज कएल गेल अछि।
अरविंद कुमारक आरोप अछि जे बुधदिन करीब 10 बजे मोटरसाइकिलसँ कार्यालय जाइत काल गर्दनीबाग धरना स्थल लग एकटा कारी स्कॉर्पियो हुनकर बाइकमे टक्कर मारि देलक। विरोध करबाक क्रममे स्कॉर्पियो सवार लोकनि हुनकासँ मारिपीट केलनि। आवेदनमे पुरुषोत्तम नामक व्यक्तिपर पिस्तौल केर बटसँ माथ पर प्रहार करबाक आरोप अछि।
आवेदनक अनुसार, राजेश रंजन उर्फ पप्पू यादवपर लोहाक रॉडसँ हमला करबाक आ गरदनिसँ करीब दू तोला सोनाक चेन छीनबाक आरोप लगाओल गेल अछि। अरविंद कुमारक दावा अछि जे घटना सांसद पप्पू यादवक मौजूदगी आ हुनकर कथित उकसाबा पर भेल।
पुलिस एफआइआर दर्ज कऽ मामिलाक जांच शुरू कऽ देलक अछि। एहि बीच पूर्णियामे पप्पू यादवक समर्थक सभ आरोपकेँ खारिज करैत एकरा राजनीतिक साजिश बतौलक अछि आ निष्पक्ष जांचक मांग केलनि।
