स्मार्ट मीटरक आड़मे शराब तस्करी, कंटेनरसँ 102 कार्टन विदेशी शराब बरामद
मुजफ्फरपुर । समदिया
बिहारमे पूर्ण शराबबंदी लागू रहितो तस्कर सभ नव-नव तरीकासँ शराबक खेप पहुंचाबयमे लागल अछि। मुजफ्फरपुरक बेनीबाद थाना क्षेत्रमे पुलिस बिजलीक स्मार्ट मीटरक आड़मे कएल जा रहल शराब तस्करीक खुलासा कयलक अछि।
एनएच-27 पर वाहन जांचक क्रममे पुलिस एकटा संदिग्ध कंटेनर रोकि तलाशी लेलक। कंटेनरक केबिनमे बनाओल गेल गुप्त तहखानासँ 102 कार्टून विदेशी शराब आ 48 कार्टून बीयर बरामद भेल। पुलिस कंटेनरक चालक-उपचालक सहित तीन तस्करकेँ गिरफ्तार कयने अछि।
एसडीपीओ अलय वत्सक अनुसार, कंटेनरमे ऊपरसँ 650 कार्टून बिजलीक स्मार्ट मीटर लादल छल आ तकर नीचाँ शराबक खेप नुकाओल गेल छल। प्रारंभिक जांचमे पता चलल अछि जे कंटेनर असमसँ स्मार्ट मीटर लऽ कऽ बिहार दिसि आबि रहल छल। पुलिस कंटेनर जब्त कऽ गिरफ्तार आरोपित सभसँ पूछताछ कऽ रहल अछि। शराब तस्करीक पूरा नेटवर्कक पड़ताल जारी अछि।
