शी जिनपिंग ब्रिक्स शिखर सम्मेलनमे 12-13 सितंबरकेँ रहताह भारत दौरा पर
चीनक विदेश मंत्रालय कयलक पुष्टि, पीएम मोदीसँ द्विपक्षीय वार्ता हेबाक संभावना
नई दिल्ली । समदिया
चीनक राष्ट्रपति शी जिनपिंग 12 सँ 13 सितंबर धरि दू दिवसीय भारत दौरा पर रहताह। ओ नई दिल्लीमे आयोजित 18म ब्रिक्स शिखर सम्मेलनमे भाग लेताह। चीनक विदेश मंत्रालय बृहस्पतिकेँ एकर पुष्टि कयलक।
विदेश मंत्रालय एक्स पर कहलक जे प्रधानमंत्री नरेंद्र मोदीक आमंत्रण पर शी जिनपिंग ब्रिक्स सम्मेलनमे शामिल होयबाक लेल भारत आबि रहल छथि। लगभग सात वर्ष बाद चीनी राष्ट्रपतिक ई पहिल भारत यात्रा होयत।
ई दौरा एहेन समयमे भऽ रहल अछि, जखनि गलवान संघर्ष (2020)क बाद भारत-चीन संबंधकेँ स्थिर करबाक प्रयास जारी अछि। हालमे प्रधानमंत्री मोदी आ शी जिनपिंगक बिश्केकमे एससीओ शिखर सम्मेलनक दौरान संक्षिप्त बातचीत भेल छल। ब्रिक्स सम्मेलनक दौरान दुनू नेताक बीच द्विपक्षीय वार्ताक संभावना अछि।
भारत लगातार भारत-चीन सीमाक्षेत्रमे शांति बनौने रखबाक आवश्यकता पर जोर दैत रहल अछि। हालमे एलएसी पर वरिष्ठ सैन्य कमांडर स्तरक फ्लैग मीटिंग सेहो भेल अछि। अगस्तमे बीजिंगमे भारतक एनएसए आ सीमा मामिलाक विशेष प्रतिनिधि अजीत डोभाल तथा चीनी विशेष प्रतिनिधि वांग यी बीच भारत-चीन सीमा आ द्विपक्षीय संबंध पर व्यापक चर्चा भेल छल।
