‘मनक बात’मे पीएम मोदी कहलनि – कुपोषणक विरुद्ध अभियानकेँ बनाउ जनआंदोलन

नई दिल्ली । समदिया

प्रधानमंत्री नरेंद्र मोदी रविदिन ‘मनक बात’क 138म एपिसोडमे कुपोषणक विरुद्ध चलि रहल जन-अभियानक सराहना कयलनि। ओ कहलनि जे सितंबर मास कुपोषणक विरुद्ध लड़ाइकेँ मजबूत करबाक आ स्वस्थ एवं सुपोषित भारतक निर्माण लेल समर्पित अछि।

पीएम मोदी छत्तीसगढ़क ‘हर घर मुनगा-घर-घर मुनगा’ अभियानक उल्लेख करैत कहलनि जे एहि माध्यमसँ लोककेँ पौष्टिक मुनगा (मोरिंगा) अपन भोजनमे शामिल करबाक लेल प्रेरित कयल जा रहल अछि। गुजरातमे मिलेट्ससँ बनल व्यंजनक प्रतियोगिताक सेहो ओ प्रशंसा कयलनि। एहि प्रतियोगितामे एखनि धरि दू लाखसँ बेसी लोक भाग लेने छथि।

महाराष्ट्रमे शिक्षक, आंगनवाड़ी कार्यकर्ता आ बच्चाक माता-पिताक संयुक्त रूपसँ चलि रहल जागरूकता अभियानकेँ पीएम सराहलनि। ओ मिजोरममे पोषण वाटिकाक देखभाल लेल शुरू भेल सामुदायिक अभियानकेँ सेहो प्रशंसनीय बतौलनि।

प्रधानमंत्री कहलनि जे तकनीकक उपयोगसँ पोषण अभियानकेँ नव गति भेटल अछि। आंगनवाड़ी केंद्र सभ ‘पोषण ट्रैकर’सँ डिजिटल रूपसँ जुड़ल अछि आ करीब 9 करोड़ लाभार्थी एहि पर पंजीकृत भऽ चुकल छथि। एहिसँ बच्चा, गर्भवती महिला आ स्तनपान कराबयवाली माताक बेहतर देखभालमे सहायता भेटि रहल अछि।

पीएम मोदी देशवासीसँ कुपोषणक विरुद्ध एहि अभियानकेँ निरंतर मजबूत करबाक आ देशकेँ कुपोषणमुक्त बनाबय लेल सामूहिक प्रयास जारी रखबाक आह्वान कयलनि।