डाकबंगला पर प्रदर्शनकारी आ पुलिसकर्मी आमने-सामने, वाटर कैनन चलल
पटना । समदिया
विभिन्न मांगकेँ लऽ कऽ सोमदिन पटनामे अलग-अलग संगठन आ छात्र सभक प्रदर्शनसँ कतेको इलाकामे अफरा-तफरीक स्थिति बनल रहल। गांधी मैदानसँ निकलल प्रदर्शनकारी जेपी गोलंबर होइत डाकबंगला चौराहा पहुँचल, जतऽ पुलिस हुनका सभकेँ रोकबाक प्रयास केलक। स्थिति तनावपूर्ण भेलापर पुलिस वाटर कैनन चलौलक आ किछु प्रदर्शनकारीकेँ हिरासतमे लेल गेल।
वामपंथी संगठन सभक नेतृत्वमे मुख्य निर्वाचन आयुक्त ज्ञानेश कुमारक इस्तीफा सहित विभिन्न मांगकेँ लऽ कऽ प्रदर्शन शुरू भेल छल। दोसर दिसि मेडिकल आ नर्सिंग छात्र सभ सेहो अपन मांगकेँ लऽ कऽ गांधी मैदानसँ मुख्यमंत्री आवास दिसि मार्च केलनि। पूर्णिया सांसद पप्पू यादव छात्र सभक समर्थनमे मार्चमे शामिल भेलाह।
पप्पू यादव बिहार यूनिवर्सिटी ऑफ हेल्थ साइंसेजमे स्थायी कुलपति नियुक्त करबाक, परीक्षा कॉपीक पुनर्मूल्यांकनक व्यवस्था, समय पर शैक्षणिक कैलेंडर लागू करबाक आ छात्र सभकेँ स्टाइपेंड देबाक मांग केलनि।
डाकबंगला चौराहा पर प्रदर्शनकारी आ पुलिसक बीच तनाव बढ़लापर पहिने वाटर कैननक प्रयोग कएल गेल। बादमे पुलिस प्रदर्शनकारी सभकेँ हटेबाक लेल बल प्रयोग केलक आ कतेको महिला-पुरुषकेँ हिरासतमे लेल गेल। प्रदर्शनक कारण गांधी मैदान, जेपी गोलंबर आ डाकबंगला चौराहाक आसपास यातायात सेहो प्रभावित रहल।