एलएनजी ट्रेनक शुरुआत, साबरमतीमे 1,472 करोड़क रेल परियोजनाक उद्घाटन
अहमदाबाद । समदिया
केंद्रीय गृह मंत्री अमित शाह रविकेँ साबरमती रेलवे स्टेशनसँ एलएनजीसँ चलयवला देशक पहिल ट्रेनकेँ हरियर झंडी देखौलनि। एहि अवसर पर ओ एकरा पर्यावरण संरक्षणक दिसामे महत्वपूर्ण पहल बतौलनि। कार्यक्रममे साबरमती रेलवे डिवीजनमे यात्री सुविधा, सुरक्षा आ पर्यावरणसँ जुड़ल विभिन्न परियोजनाक उद्घाटन आ शिलान्यास सेहो भेल।
अमित शाह कहलनि जे प्रधानमंत्री नरेंद्र मोदीक नेतृत्वमे भारतीय रेल विकासक नव गति पकड़लक अछि। देशमे रेलवे विद्युतीकरणक करीब 99.6 प्रतिशत काज पूरा भऽ गेल अछि आ 2030 धरि डीजलक खपत शून्य करबाक लक्ष्य अछि।
ओ कहलनि जे 2015-16 मे भारतीय रेल करीब 293 करोड़ लीटर डीजल खर्च करैत छल, जे 2024-25 मे घटि कऽ करीब 108 करोड़ लीटर रहि गेल अछि। डीजल खपत घटलासँ विदेशी मुद्रामे सेहो बचत होयत।
शाह साबरमती रेलवे स्टेशनमे भेल बदलावक उल्लेख करैत कहलनि जे आइ एतय मेट्रो रेल, राज्य परिवहन बस सेवा आ आगू हाई-स्पीड रेलसँ कनेक्टिविटी उपलब्ध होयत। साबरमतीमे करीब 1,472 करोड़ टकाक विभिन्न रेल परियोजनासँ यात्री सुविधा आ सुरक्षा बेसी मजबूत होयत।
ओ रेल मंत्री अश्विनी वैष्णव आ साबरमती रेलवे डिवीजनक टीमकेँ नव पहल लेल बधाई देलनि। शाहक अनुसार, रेलवे क्षेत्रमे मेक इन इंडियाकेँ बढ़ावा देल जा रहल अछि आ स्वदेशी उत्पादनकेँ 100 प्रतिशत धरि पहुँचयबाक दिशामे काज चलि रहल अछि।
