बिहारमे बनत महिला विश्वविद्यालय, छात्रासँ कुलपतिधरि सभ महिला : सीएम सम्राट
पटना । समदिया
रक्षाबंधनक अवसर पर बिहारक बेटी आ महिलासभ लेल मुख्यमंत्री सम्राट चौधरी एकटा पैघ घोषणा कएलनि अछि। बिहारमे एहेन विशेष महिला विश्वविद्यालयक स्थापना कएल जाएत, जतऽ पढ़निहार छात्रासँ लऽ कऽ कुलपतिधरि सभ महिला होएतीह। एहि विश्वविद्यालयमे पढ़ाबयवला शिक्षिकासभ आ आन समस्त कर्मचारी सेहो महिलेसभे होएतीह।
मुख्यमंत्री कहलनि जे एहि विश्वविद्यालयक स्थापनासँ बिहारक बेटीसभकेँ उच्च शिक्षाक लेल सुरक्षित, अनुकूल आ बेहतर शैक्षणिक वातावरण भेटतनि।
5 लाख महिलाक खातामे पहुँचाओल गेल लगभग 600 करोड़ रुपया
बृहस्पतिकेँ पटना स्थित बापू सभागारमे ‘समृद्ध महिला, समृद्ध बिहार अभियान’क शुरुआत कएल गेल। एहि अवसर पर मुख्यमंत्री सम्राट चौधरी महिला रोजगार योजना अन्तर्गत 5 लाख महिलाक बैंक खातामे लगभग 600 करोड़ रुपया सीधे हस्तांतरित कएलनि।
एहि रकममे योजनाक पहिल आ दोसर किस्तक राशि शामिल अछि। मुख्यमंत्री ईहो घोषणा कएलनि जे वर्ष 2030 धरि जीविका दीदीसभक विकास आ हुनका आत्मनिर्भर बनेबाक लेल राज्य सरकार लगभग 20 हजार करोड़ रुपया खर्च करत।
बेटी स्टार्टअप चैलेंजमे 2 लाख रुपयाधरि सहायता
महिला उद्यमिताक बढ़ावा देबाक लेल राज्य सरकार ‘बेटी स्टार्टअप चैलेंज’क शुरुआत सेहो कएने अछि। एहि योजनाक अन्तर्गत नव व्यवसाय शुरू करबाक वा पुरान व्यवसायक विस्तार करबाक इच्छुक महिला उद्यमीसँ 50 हजार रुपयासँ 2 लाख रुपयाधरि आर्थिक सहायता देल जाएत।
एहि योजनासँ लगभग 2100 महिला उद्यमी लाभान्वित होएतीह, जाहिसँ ओ अपन नव विचार आ व्यवसायिक योजनाक रूप देबामे सक्षम भऽ सकथि।
पीएचडी करैत छात्रासभ केँ 10 हजार रुपया मासिक सहायता
उच्च शिक्षामे बेटीसभक भागीदारी बढ़ेबाक उद्देश्यसँ ‘बालिका पीएचडी फेलोशिप योजना’ शुरू कएल गेल अछि। एहि योजना अन्तर्गत पीएचडी करैत 1000 छात्रासभकेँ चारि वर्षधरि प्रतिमाह 10 हजार रुपया आर्थिक सहायता देल जाएत।
स्कूल-कॉलेजक बाहर तैनात रहती ‘पुलिस दीदी’
बेटीसभक सुरक्षाक ध्यानमे राखैत स्कूल आ कॉलेजक बाहर ‘पुलिस दीदी’क तैनाती करबाक निर्णय सेहो लेल गेल अछि। एहि व्यवस्थाक लेल मुख्यमंत्री 4700 दू-पहिया वाहनकेँ हरी झंडी देखा कऽ रवाना कएलनि।
सरकारक उद्देश्य स्कूल-कॉलेजक आसपास छात्रासभक सुरक्षा सुनिश्चित करब आ मनचलासभ पर प्रभावी अंकुश लगायब अछि।
मुख्यमंत्रीक एहि घोषणाकेँ बिहारमे महिला शिक्षा, सुरक्षा, रोजगार आ आत्मनिर्भरताक दिशामे एकटा महत्वपूर्ण पहल मानल जा रहल अछि।
